អ៊ីស្លាម៉ាបាដ៖ ប្រទេសប៉ាគីស្ថាន បានច្រានចោលទាំងស្រុងនូវរបាយការណ៍របស់ក្រសួងការបរទេសសហរដ្ឋអាមេរិក ស្តីពីសេរីភាពសាសនា ដោយថា របាយការណ៍ឯកតោភាគី ដែលវាយតម្លៃស្ថានភាពសិទ្ធិមនុស្សរបស់ប្រទេសផ្សេងទៀត គឺមិនសេរីពីការលំអៀង ផ្នែកនយោបាយ និងបង្ហាញរូបភាពមិនពេញលេញ និងបំភ្លៃ។
អ្នកនាំពាក្យក្រសួងការបរទេស ប៉ាគីស្ថាន លោក Mumtaz Zahra Baloch បានឲ្យដឹងថា វិធីសាស្រ្ត ដែលត្រូវបានអនុម័តក្នុងការរៀប ចំរបាយការណ៍ទាំងនេះ និងអាណត្តិ និងជំនាញរបស់អ្នកនិពន្ធរបស់ខ្លួន មិនមានតម្លាភាពនោះទេ។
ការចេញផ្សាយរបាយការណ៍ ស្តីពីសេរីភាពសាសនា អន្តរជាតិឆ្នាំ២០២៣ កាលពីសប្តាហ៍មុន រដ្ឋមន្ត្រីការបរទេស សហរដ្ឋអាមេរិក លោក Antony Blinken បានសំដៅលើច្បាប់ប្រមាថនៅក្នុងប្រទេសប៉ាគីស្ថានថា ជាអ្វីមួយដែល “ជួយជំរុញឱ្យមានបរិយាកាសនៃការមិនអត់ឱន និងការស្អប់ខ្ពើម ដែលអាចនាំឱ្យ មានអំពើហិង្សាកើតឡើង” ។
លោក Baloch បានលើកឡើងថា ប្រទេសប៉ាគីស្ថាន បដិសេធទាំងស្រុង ការអះអាងដែលគ្មានមូលដ្ឋានរបស់អាមេរិក នេះបើយោងតាមការចុះផ្សាយ របស់ទីភ្នាក់ងារសារព័ត៌មាន ចិនស៊ិនហួ។
អ្នកនាំពាក្យរូបនេះបានបន្ដថា “យើងជឿថា សេរីភាពសាសនាអន្តរជាតិ មិនអាចត្រូវបានមើលឃើញពីកញ្ចក់នៃទស្សនៈសង្គមនិងផ្លូវច្បាប់ របស់ប្រទេសណា មួយឡើយ” ៕
ប្រែសម្រួល ឈូក បូរ៉ា
