បរទេស៖ យោងតាមការចេញផ្សាយរបស់ RT ប្រធានាធិបតីអាមេរិកលោក Joe Biden បានបញ្ជាក់ជាថ្មីម្តងទៀត នូវការប្តេជ្ញាចិត្តរបស់គាត់ ក្នុងការឈរឈ្មោះសម្រាប់អាណត្តិទីពីរ នៅក្នុងខែវិច្ឆិកានេះ ហើយបានសរសេរសំបុត្រមួយច្បាប់ ទៅកាន់សមាជិកសភាបក្សប្រជាធិបតេយ្យ របស់គាត់ដើម្បីបញ្ជាក់អំពីជំហផងដែរ។
សាររបស់លោក Biden កើតឡើងបន្ទាប់ពីការជជែកដេញដោល ជាងមួយសប្តាហ៍នៅក្នុងប្រព័ន្ធ ផ្សព្វផ្សាយរបស់សហរដ្ឋអាមេរិក និងក្នុងចំណោមអ្នកប្រជាធិបតេយ្យជាន់ខ្ពស់ អំពីអ្នកណាដែលអាចជំនួសគាត់ជា បេក្ខភាពសម្រាប់ការបោះឆ្នោតនៅឆ្នាំនេះ។
ថ្មីៗកន្លងមកនេះក្រុមអ្នកគាំទ្រ និងអ្នកផ្តល់ជំនួយសំខាន់ៗជាច្រើនរបស់គាត់ មានការព្រួយបារម្ភកាន់តែខ្លាំងឡើង លើសុខភាពផ្លូវចិត្តរបស់បុរសអាយុ៨១ឆ្នាំរូបនេះ បន្ទាប់ពីការជជែកដេញដោលថ្មីៗនេះ ជាមួយគូប្រជែងគណបក្សសាធារណរដ្ឋលោក Donald Trump ។
ក្នុងអំឡុងពេលព្រឹត្តិការណ៍នោះ លោក Biden បានចេញមកពិភាក្សាវែកញែក ដោយបង្ហាញនូវភាពទន់ខ្សោយផ្នែករាង្គកាយ ទាំងដែលខិតខំព្យាយាមបញ្ចប់ ប្រយោគរបស់គាត់ ដោយលាយបញ្ចូលគ្នានូវពាក្យសម្ដីខ្វះខាត និងបាត់បង់ការគិតរបស់គាត់ជាច្រើនដង។
ទោះជាយ៉ាងណាក៏ដោយ នៅក្នុងលិខិតមួយផ្ញើទៅកាន់ សមាជិកបក្សប្រជាធិបតេយ្យរបស់គាត់ នៅក្នុងសភាកាលពីថ្ងៃចន្ទ លោក Biden បានសង្កត់ធ្ងន់ថាគាត់នៅតែ ប្តេជ្ញាចិត្តយ៉ាងមុតមាំ ដើម្បីបន្តនៅក្នុងការប្រកួតប្រជែងប្រធានាធិបតី ឆ្នាំ២០២៤នេះ ហើយបានអំពាវនាវឱ្យសមាជិកសភាគាំទ្រ យុទ្ធនាការរបស់គាត់ ដើម្បីឈ្នះការបោះឆ្នោតលើកនេះទៀតផង ៕
ប្រែសម្រួល៖ ស៊ុន លី
