បរទេស ៖ យោងតាមការចេញផ្សាយរបស់ RT អគារមួយកន្លែង ដែលស្ថិតនៅកណ្តាលក្នុងទីក្រុងបេរូត ប្រទេសលីបង់ត្រូវបានបំផ្លាញនៅក្នុងប្រតិបត្តិការអ៊ីស្រាអែល ដែលបាននិយាយថា ជាការវាយប្រហារចំគោលដៅ លើមេបញ្ជាការក្រុមហេសបូឡាហើយ ការវាយប្រហារនេះបានធ្វើឱ្យមានការព្រួយបារម្ភអំពីសង្គ្រាមកាន់តែធំឡើងនៅក្នុងតំបន់ ។
ប្រព័ន្ធផ្សព្វផ្សាយ ក្នុងស្រុក របស់លីបង់បានរាយការណ៍ ពីការផ្ទុះនៅក្នុងតំបន់ Haret Hreik កាលពីល្ងាចថ្ងៃអង្គារ ខណៈដែលកម្លាំងយោធា របស់អ៊ីស្រាអែល បានកំណត់ តំបន់គោលដៅថាជា Dahieh ប៉ុន្តែយ៉ាងណាក្តីវាមិនច្បាស់ថា តើយន្តហោះឬយន្តហោះគ្មានមនុស្សបើកជាអ្នកបើកការ វាយប្រហារលើកនេះ ។
ជាលទ្ធផលយ៉ាងហោចណាស់ មនុស្សពីរនាក់បានស្លាប់ និង ២០នាក់បានរងរបួសនៅក្នុងការវាយប្រហារលើកនេះ រួមទាំងកុមារផងដែរ នេះបើយោងតាមអ្នកឆ្លើយឆ្លងព័ត៌មាន RT ប្រចាំនៅតំបន់អារ៉ាប់។
កងកម្លាំងការពារអ៊ីស្រាអែល ដែលហៅកាត់ថាIDFបានអះអាងទទួលខុសត្រូវ ចំពោះការវាយប្រហារនេះ ហើយបាននិយាយថា ខ្លួនបានកំណត់គោលដៅ លើមេបញ្ជាការក្រុមហេសបូឡា ដែលទទួលខុសត្រូវ ចំពោះការវាយប្រហារកាលពីថ្ងៃសៅរ៍ លើភូមិមួយនៅតំបន់ Golan Heights និងការសម្លាប់ជនស៊ីវិលអ៊ីស្រាអែល បន្ថែមជាច្រើននាក់ ៕
ប្រែសម្រួល៖ស៊ុនលី
