ចិន៖ ក្រុមហ៊ុនផលិតក្បាលរថភ្លើង CRRC របស់ចិន បានបង្ហើបឱ្យដឹងថា ខ្លូននឹងជួយមិត្តកម្ពុជា ប្រសិនបើមានគម្រោងបង្កើន សមត្ថភាពផ្លូវដែក សម្រាប់ថ្ងៃអនាគត ។
ការបង្ហើបឱ្យដឹងនេះធ្វើឡើង ក្នុងឱកាសសមាគមអ្នកសារព័ត៌មាន កម្ពុជា-ចិន ដែលហៅកាត់ (CCJA) ដឹកនាំដោយលោក សយ សុភាព ប្រធាន និងលោក លី សៅគ័ង សហប្រធានសមាគម អ្នកសារព័ត៌មានកម្ពុជា-ចិន ចូលទស្សនារោងចក្រដំឡើងនិងផលិតក្បាលរថភ្លើង CRRC របស់ចិន ដែលមានទីតាំងនៅក្រុងឆានឈុន ខេត្តជីលីន នៃសារធារណរដ្ឋប្រជាមានិតចិន នាថ្ងៃទី៣០ ខែកក្កដា ឆ្នាំ២០២៤នេះ។
ក្នុងជំនួបក្រោយបញ្ចប់ដំណើរ ទស្សនានៅរោងចក្រដំឡើងនិងផលិតក្បាលរថភ្លើង CRRC លោក Yin Yueqian អគ្គនាយករងនៃនាយកដ្ឋាន ពាណិជ្ជកម្មក្រៅប្រទេសនៃក្រុមហ៊ន CRRC បានបញ្ជាក់ថា” ប្រសិនបើថ្នាក់ថឹកនាំនៃប្រទេសទាំងពីរ អាចពិភាក្សាគ្នាលើគម្រោងផ្លូវដែកមែន ខ្ញុំពិតជាគាំទ្រខ្លាំង សម្រាប់ការផលិតជូនដោយគ្មានអ្វីទាស់”។
លោក Yin Yueqian ក៏បានឱ្យដឹងថា ក្រោមការដឹកនាំរបស់រដ្ឋាភិបាលចិន ក្រុមហ៊ុន CRRC បាននិងកំពុងមានគម្រោងផលិតរថភ្លើងល្បឿនលឿន ដែលមានសមត្ថភាពអាចរត់ចំងាយ 600km/h សម្រាប់ថ្ងៃអនាគតផងដែរ។
លោក សយ សុភាព ប្រធានសមាគមអ្នកសារព័ត៌ កម្ពុជា-ចិន បានសម្ដែងនូវការថ្លែងអំណរគុណ ដល់រដ្ឋាភិបាល និងប្រជាជនជនចិន ក្នុងក្របខណ្ឌផ្លូវមួយនិង ខ្សែក្រវ៉ាត់មួយ ហៅកាត់ថា BRI ដែលបានចូលរួមចំណែកក្នុងការជំរុញ ប្រព័ន្ធហេដ្ឋារចនាសម្ព័ន្ធនៅកម្ពុជា នាអតីតកាល បច្ចុប្បន្ន និងទៅអនាគត ឱ្យមានភាពជឿនលឿន។
លោក សយ សុភាព បញ្ជាក់ថា “ក្រោមការដឹកនាំនៃរដ្ឋាភិបាល របស់ប្រទេសទាំងពីរ នឹងកាន់តែជួយជំរុញ សេដ្ឋកិច្ច អធិបតេយ្យភាព របស់កម្ពុជា អោយកាន់តែរឹងមាំ បន្ថែមទៀត” ៕
