កណ្ដាល ៖ លោក គួច ចំរើន អភិបាល ខេត្តកណ្តាល បានជំរុញរដ្ឋបាលក្រុងអរិយក្សត្រ ពង្រឹងលើការបង្ក្រាបបទល្មើស គ្រឿងញៀន ល្បែងស៊ីសង និងក្មេងទំនើង គ្រោះថ្នាក់ចរាចរណ៍ និងខិតខំបំរើសេវា សាធារណៈ ឱ្យកាន់តែល្អប្រសើរឡើង។
ការលើកឡើងរបស់ អភិបាលខេត្តកណ្ដាល នាឱកាសអញ្ជើញរួមជាមួយ លោក នូ សាខន ប្រធានក្រុមប្រឹក្សាខេត្តកណ្តាល ជួបសំណេះសំណាលជាមួយ ថ្នាក់ដឹកនាំ មន្ត្រីរាជការ និងកងកម្លាំងមានសមត្ថកិច្ច នៃរដ្ឋបាលក្រុងអរិយក្សត្រ នៅថ្ងៃទី៧ សីហា ដើម្បីបង្កើនភាពស្និទស្នាល និងពង្រឹងលើការ បម្រើសេវាសាធារណៈជូន ប្រជាពលរដ្ឋឲ្យកាន់តែ មានប្រសិទ្ធភាពខ្ពស់។
ក្នុងពិធីសំណេះសំណាលនេះ លោក គួច ចំរើន អភិបាលខេត្ត បានណែនាំដល់ គណៈបញ្ជាការឯកភាពរដ្ឋបាល ក្រុងអរិយក្សត្រ ត្រូវការពារសន្តិសុខ សណ្តាប់ធ្នាប់សាធារណៈ ដោយបន្តការខិតខំប្រឹងប្រែង សហការល្អជាមួយ គ្រប់អង្គភាព មន្ទីរជំនាញពាក់ព័ន្ធ ដើម្បីរក្សាបាននូវសុខសុវត្ថិភាព ស្ថេរភាព សេចក្ដីសុខជូនប្រជាពលរដ្ឋ នៅតាមមូលដ្ឋានរបស់ខ្លួន ជាពិសេសគណៈបញ្ជាការឯកភាពរដ្ឋបាលក្រុង ត្រូវបន្តខិតខំយកចិត្តទុកដាក់ខ្ពស់ ក្នុងការអនុវត្តឱ្យបានម៉ឺងម៉ាត់តាមបទបញ្ជាដ៏ខ្ពង់ខ្ពស់របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ក្នុងការបង្រ្កាប ទប់ស្កាត់ និងចាត់វិធានការច្បាប់យ៉ាងតឹងរ៉ឹងបំផុតចំពោះបទល្មើស គ្រឿងញៀន ល្បែងស៊ីសងខុសច្បាប់គ្រប់ប្រភេទ ក្មេងទំនើង និងគ្រោះថ្នាក់ចរាចរណ៍ អោយមានប្រសិទ្ធភាពខ្ពស់។
លោកអភិបាលខេត្ត បានក្រើនរំលឹក ដល់រដ្ឋបាលក្រុង អរិយក្សត្រត្រូវដឹកនាំមន្រ្តី ឱ្យបន្តខិតខំបំរើសេវារដ្ឋបាល ជូនប្រជាពលរដ្ឋកាន់តែល្អប្រសើរឡើងថែមទៀត ត្រូវកែប្រែឥរិយាបទពីអ្នកគ្រប់គ្រង ទៅជាអ្នកបំរើសេវា សាធារណៈជូនប្រជាពលរដ្ឋគ្រប់ស្រទាប់វណ្ណៈ ក្នុងមូលដ្ឋានដោយមិនប្រកាន់បក្សពួក និន្នាការនយោបាយឡើយ ស្របទៅតាមគោលនយោបាយ របស់រាជរដ្ឋាភិបាល ដែលបានបញ្ជាក់យ៉ាងច្បាស់ថា មន្ត្រីជាគឺជាអ្នកបំរើសរាស្ត្រ មិនមែនជាចៅហ្វាយនាយរបស់រាស្ត្រឡើយ ដូច្នេះក្នុងនាមជាមន្ត្រីត្រូវខិតខំធ្វើយ៉ាង ណាសហការគ្នាគិតខំដោះស្រាយ បញ្ហាប្រឈមនានាក្នុងមូលដ្ឋាន ឆ្លើយតបឲ្យបានទៅនឹងសេចក្ដីត្រូវការរបស់ប្រជាពលរដ្ឋ ជាពិសេសត្រូវរួមសហការគ្នា បម្រើសេវាសាធារណៈ ជូនប្រជាពលរដ្ឋឲ្យបានគាប់ប្រសើរ ធ្វើឲ្យប្រជាពលរដ្ឋមានភាពកក់ក្តៅ ជឿជាក់ និងគាំទ្រលើការដឹកនាំរបស់អាជ្ញាធរ។
នាឱកាសនេះដែរ លោកអភិបាលខេត្ត ក៏បានលើកទឹកចិត្ត ដល់រដ្ឋបាលក្រុងអរិយក្សត្រ ពាក់ព័ន្ធនឹងការរៀបចំតែងតាំងមន្ត្រី ក្នុងប្រអប់ដែលទំនេរឱ្យអស់ ដើម្បីពង្រឹងរចនាសម្ព័ន្ធ បង្កើនប្រសិទ្ធភាពការងារ និងធានានិរន្តរភាពការងារឲ្យទៅមុខ ហើយការតែងតាំងគួរផ្ដល់អទិភាពទៅលើស្ត្រី ជាពិសេសត្រូវគិតគូរទៅលើ ការដំឡើងថ្នាក់មន្ត្រីកុំមានភាពយឺតយ៉ាវតាមឆ្នាំ និងតាមសញ្ញាប័ត្រជាក់ស្ដែងរបស់មន្ត្រី ដើម្បីឱ្យពួកគាត់ទទួលបាននូវអត្ថប្រយោជន៍ផ្សេងៗផងដែរ។
សូមបញ្ជាក់ថា ពិធីសំណេះសំណាលនេះគឺជាលើដំបូងសម្រាប់ក្រុងអរិយក្សត្រ បន្ទាប់ពី លោក គួច ចំរើន បានចូលកាន់មុខតំណែង ជាអភិបាលខេត្ត រយៈពេល ១ខែជាង ហើយលោកអភិបាលខេត្ត ក៏បានមានប្រសាសន៍ សំណេះសំណាលសាកសួរសុខទុក្ខ ព្រមទាំងបានមានប្រសាសន៍ពីប្រវត្តិផ្ទាល់ខ្លួន ការឆ្លងកាត់របបនយោបាយ ការសិក្សារៀនសូត្រ បទពិសោធន៍ និងប្រវត្តិការងារ ដើម្បីបង្កើនភាពស្និទ្ធស្នាល ស្គាល់គ្នាឱ្យកាន់ជិតស្និទ្ធ ជាមួយរដ្ឋបាលក្រុងអរិយក្សត្រ ងាយស្រួលទំនាក់ទំនងការងារជាមួយគ្នា បានកាន់តែប្រសើរបន្ថែមទៀត៕
