យេរ៉ូសាឡឹម៖ នាយករដ្ឋមន្ត្រីអ៊ីស្រាអែល លោក បេនចាមីន ណេតាន់យ៉ាហ៊ូ បានចោទប្រកាន់ក្រុមហាម៉ាស់ ពីការបដិសេធក្នុងការសម្របសម្រួល ក្នុងការចរចាបទឈប់បាញ់ ដោយបានសង្កត់ធ្ងន់ថា សម្ពាធគួរតែត្រូវបាន ដឹកនាំទៅកាន់ ក្រុមប៉ាឡេស្ទីន ចំពេលមានកិច្ចខិតខំប្រឹងប្រែងបទ ឈប់បាញ់អន្តរជាតិ ដែលកំពុងបន្ត។
ថ្លែងនៅក្នុងកិច្ចប្រជុំគណៈរដ្ឋមន្ត្រីប្រចាំ សប្តាហ៍របស់លោក, លោក ណេតាន់យ៉ាហ៊ូ បានរំលឹកឡើងវិញថា អ៊ីស្រាអែល នឹងមិនសម្របសម្រួលលើបញ្ហា សន្តិសុខឡើយ ដោយលោកបានបន្តថា “យើងចូលរួមក្នុងការចរចាមិនមែនជាការផ្តល់រង្វាន់នោះទេ។ មានរឿងដែលយើង អាចបត់បែនបាន ហើយមានរឿងខ្លះ ដែលយើងមិនអាចបត់បែនបាន”។
លោក បានបញ្ជាក់ជាថ្មីនូវការប្តេជ្ញាចិត្ត របស់អ៊ីស្រាអែល ចំពោះសំណើបីដំណាក់ កាលដែលបង្ហាញដោយប្រធានាធិបតី អាមេរិកលោក ចូ បៃដិន កាលពីខែឧសភា ដែលរួមមានបទ ឈប់បាញ់ និងការដកទ័ពអ៊ីស្រាអែល ចេញពីតំបន់ហ្គាហ្សា ជាថ្នូរនឹងការដោះលែងចំណាប់ខ្មាំង និងអ្នកទោសប៉ាឡេស្ទីន។
លោកបានបន្ថែមថា “សម្ពាធយោធាដ៏ខ្លាំងក្លា រួមជាមួយនឹងសម្ពាធការទូតដ៏ខ្លាំងក្លា គឺជាមធ្យោបាយ ដើម្បីសម្រេចបាននូវការដោះលែង ចំណាប់ខ្មាំងរបស់យើង” នេះបើយោងតាមការ ចុះផ្សាយរបស់ទីភ្នាក់ងារ សារព័ត៌មានចិនស៊ិនហួ ។
រដ្ឋមន្ត្រីការបរទេសអាមេរិក លោក Antony Blinken ត្រូវបានគេរំពឹងថា នឹងធ្វើទៅកាន់ ប្រទេសអ៊ីស្រាអែល នៅថ្ងៃអាទិត្យដើម្បីកិច្ចខិតខំប្រឹង ប្រែងបន្ថែមទៀត ដើម្បីទទួលបានកិច្ចព្រមព្រៀង បទឈប់បាញ់នៅហ្គាហ្សា។
ដំណើរទស្សនកិច្ចនេះធ្វើឡើងបន្ទាប់ពីការចរចា ពីរថ្ងៃនៅទីក្រុងដូហា ដែលមានការចូលរួមពីអ្នកចរចាកាតា អេហ្ស៊ីប និងអាមេរិក។ អ្នកសម្រុះសម្រួល និងគណៈប្រតិភូអ៊ីស្រាអែល គ្រោងនឹងធ្វើដំណើរ ទៅកាន់ទីក្រុងគែរ ដើម្បីបន្តកិច្ចពិភាក្សា ក្នុងសប្តាហ៍នេះ ៕
ប្រែសម្រួល ឈូក បូរ៉ា
