បរទេស៖យោងតាមការចេញផ្សាយរបស់ RT ដែលបានដកស្រង់ព័ត៌មានចេញពីទូរទស្សន៍ TVP បានរាយការណ៍ថា នាយករដ្ឋមន្ត្រីប៉ូឡូញ លោក Donald Tusk បានកាលពីថ្ងៃសុក្របានអះអាងថា រដ្ឋាភិបាលលោកខាងលិចកំពុងពិភាក្សាអំពីផែនការពង្រឹងការការពារដែនអាកាសសម្រាប់អ៊ុយក្រែន។
ការកត់សម្គាល់នេះធ្វើឡើងបន្ទាប់ពីកិច្ចប្រជុំរបស់ Tusk ជាមួយរដ្ឋមន្ត្រីការបរទេសអាមេរិក លោក Antony Blinken ដែលបានធ្វើដំណើរមកដល់ទីក្រុង Warsaw កាលពីថ្ងៃព្រហស្បតិ៍ ដើម្បីពិភាក្សាអំពីការគាំទ្ររួមគ្នាចំពោះអ៊ុយក្រែន បន្ទាប់ពីបានទៅបំពេញទស្សនកិច្ចនៅទីក្រុងគៀវកាលពីមួយថ្ងៃមុន។
នាយករដ្ឋមន្ត្រីប៉ូឡូញបានបន្ថែមថាលោកបានសន្ទនា យ៉ាងទូលំទូលាយអំពីបញ្ហានេះជាមួយនឹងលោក Blinken ហើយថាលោកក៏នៅតែមានទំនាក់ទំនងជាទៀងទាត់ ជាមួយមេដឹកនាំពិភពលោកជាច្រើនផងដែរ។
ខណៈពេលដែលធ្វើជាម្ចាស់ផ្ទះ Blinken នៅថ្ងៃព្រហស្បតិ៍ រដ្ឋមន្ត្រីការបរទេសប៉ូឡូញ Radoslaw Sikorski បាននិយាយថាអ៊ុយក្រែនគួរតែត្រូវ បានអនុញ្ញាតឱ្យបាញ់មីស៊ីលដែលផ្គត់ផ្គង់ ដោយលោកខាងលិចចូលជ្រៅទៅក្នុងប្រទេសរុស្ស៊ីផងដែរ។
រដ្ឋាភិបាលទីក្រុងគៀវបានជំរុញជាយូរមកហើយនូវអ្នកគាំទ្រលោកខាងលិច ឱ្យអនុញ្ញាតឱ្យមានការវាយប្រហាររយៈចម្ងាយឆ្ងាយលើទឹកដីរុស្ស៊ី ដោយអះអាងថាអសមត្ថភាពក្នុងការវាយប្រហារ គោលដៅជ្រៅក្នុងប្រទេសរុស្ស៊ីដោយអាវុធលោកខាងលិចកំពុងរារាំងកងកម្លាំង របស់ខ្លួនពីភាពជោគជ័យនៅសមរភូមិ។
គួរឲ្យដឹងដែរថាកន្លងមកអាមេរិក និងសម្ព័ន្ធមិត្តតែងតែបានដាក់ការរឹតត្បិតមួយចំនួន លើការប្រើប្រាស់អាវុធរបស់ពួកគេ ដោយបញ្ជាក់ថា ពួកគេមិនចង់ពាក់ព័ន្ធដោយផ្ទាល់នៅក្នុងជម្លោះជាមួយរុស្ស៊ីទេ ខណៈពេលដែលត្រូវបានគេរាយការណ៍ថាផ្តល់អាវុធដល់អ៊ុយក្រែនដល់ទៅ២០០ពាន់លានដុល្លារ៕
ប្រែសម្រួល៖ស៊ុនលី
