គៀវ៖ មន្ត្រីរដ្ឋាភិបាលកំពូលមួយរូបបានឲ្យដឹងថា ផែនការរបស់ប្រធានាធិបតីអ៊ុយក្រែនលោក វូឡូឌីមៀ ហ្សេឡិនស្គី សម្រាប់ជ័យជំនះក្នុងសង្គ្រាមនឹងរួមបញ្ចូលបញ្ជីលម្អិតនៃធនធានយោធាដ៏សំខាន់ សម្រាប់ការកម្ចាត់រុស្ស៊ី រួមជាមួយនឹងការស្នើសុំការអនុញ្ញាតឱ្យវាយប្រហារលើទឹកដីរុស្ស៊ីដោយប្រើមីស៊ីលរយៈចម្ងាយឆ្ងាយ។
ផែនការនេះ គ្រោងដែលត្រូវបានបង្ហាញជាលើកដំបូង ក៏នឹងសង្កត់ធ្ងន់លើភាពចាំបាច់នៃការវិនិយោគ ដើម្បីពង្រឹងសមត្ថភាពផលិតអាវុធក្នុងស្រុករបស់អ៊ុយក្រែន។ វានឹងត្រូវបានបង្ហាញក្នុងអំឡុងពេលកិច្ចប្រជុំកំពូលជាមួយប្រធានាធិបតីសហរដ្ឋអាមេរិកលោក ចូ បៃដិន នៅចុងខែនេះ។
ខណៈដែលសង្រ្គាម ដែលបានចាប់ផ្តើមនៅខែកុម្ភៈ ឆ្នាំ២០២២ អូសបន្លាយ អ៊ុយក្រែនមានបំណងនាំមុខក្នុងកិច្ចខិតខំប្រឹងប្រែងសន្តិភាព ដោយស្នើវិធានការជាក់ស្តែង ដើម្បីដាក់សម្ពាធលើរុស្ស៊ីផ្នែកយោធា សេដ្ឋកិច្ច នយោបាយ និងការទូត។
លោក ហ្សេឡិនស្គី ត្រូវបានគេរំពឹងថា នឹងចូលរួមមហាសន្និបាតអង្គការសហប្រជាជាតិ នៅទីក្រុងញូវយ៉កនៅចុងខែកញ្ញា ហើយនឹងបង្ហាញផែនការជ័យជម្នះរបស់គាត់ទៅកាន់លោក បៃដិន និងបេក្ខជនទាំងពីរនៅក្នុងការបោះឆ្នោតប្រធានាធិបតីសហរដ្ឋអាមេរិកនៅថ្ងៃទី០៥ ខែវិច្ឆិកាគឺអនុប្រធានាធិបតីលោកស្រី កាម៉ាឡា ហារីស និងលោក ដូណាល់ ត្រាំ ។
នៅលើជួរមុខយោធា ផែនការនេះនឹងបញ្ជាក់អំពីបរិមាណ និងប្រភេទសព្វាវុធដែលត្រូវការ រួមទាំងមីស៊ីលរយៈចម្ងាយឆ្ងាយ ដែលផ្តល់ដោយសហរដ្ឋអាមេរិក និងអង់គ្លេស ដើម្បីសម្រេចបាននូវជ័យជម្នះ ក៏ដូចជាកាលបរិច្ឆេទនៃការចែកចាយរបស់ពួកគេ និងផលប៉ះពាល់ដែលគេរំពឹងទុកនៅលើសមរភូមិ។
ដោយគូសបញ្ជាក់អំពីជោគជ័យនៃការវាយប្រហាររបស់អ៊ុយក្រែនលើតំបន់ Kursk ភាគខាងលិចរបស់រុស្ស៊ី ផែនការនេះក៏នឹងណែនាំផងដែរថា ការបង្កើនការវាយប្រហារលើដីរុស្ស៊ី នឹងមានប្រសិទ្ធភាពក្នុងការបង្កើតភាពចលាចលសង្គមនៅក្នុងប្រទេស ដែលដឹកនាំដោយប្រធានាធិបតីលោក វ្លាឌីមៀ ពូទីន៕
ប្រែសម្រួល ឈូក បូរ៉ា
