បរទេស៖ ប្រទេសហ្វីលីពីនកាលពីថ្ងៃសុក្រ បានថ្កោលទោសការចោទប្រកាន់ របស់ចិនចំពោះការវាយលុករបស់ អ្នកនេសាទវៀតណាមនៅសមុទ្រចិនខាងត្បូង ដែលទីក្រុងម៉ានីល និងទីក្រុងប៉េកាំងក៏ត្រូវបានជាប់គាំង នៅក្នុងការប្រឈមមុខគ្នាដោយហិង្សា ដែលនាំឱ្យមានការភ័យខ្លាចនៃជម្លោះប្រដាប់អាវុធ។
យោងតាមសារព័ត៌មាន VOA ចេញផ្សាយនៅថ្ងៃទី៤ ខែតុលា ឆ្នាំ២០២៤ បានឱ្យដឹងថា ប្រទេសវៀតណាមកាលពីថ្ងៃអាទិត្យបានចោទ “កងកម្លាំងអនុវត្តច្បាប់ចិន” ថា បានវាយអ្នកនេសាទទាំង ១០នាក់ដោយដំបងដែក និងប្លន់ពួកគេ នូវត្រី និងឧបករណ៍នេសាទដែលមាន តម្លៃរាប់ពាន់ដុល្លារនៅកោះ Paracel ។
អ្នកនាំពាក្យក្រសួងការបរទេសចិន បានទទួលស្គាល់ឧប្បត្តិហេតុមួយបានកើតឡើងនៅទីនោះ ប៉ុន្តែបានជំទាស់នឹងការបកស្រាយ ព្រឹត្តិការណ៍របស់វៀតណាម។
ចិននិងវៀតណាមទាំងពីរទាមទារប្រជុំកោះប៉ារ៉ាសែល ប៉ុន្តែហ្វីលីពីនមិនព្រម។
ទីប្រឹក្សាសន្តិសុខជាតិហ្វីលីពីនលោក Eduardo Ano បាននិយាយនៅក្នុងសេចក្តីថ្លែងការណ៍មួយថា “យើងថ្កោលទោសយ៉ាងដាច់អហង្ការ ចំពោះសកម្មភាពដ៏ឃោរឃៅ និងខុសច្បាប់របស់អាជ្ញាធរដែនសមុទ្រចិន ប្រឆាំងនឹងអ្នកនេសាទវៀតណាម នៅជិតប្រជុំកោះ Paracel កាលពីថ្ងៃទី២៩ ខែកញ្ញា ឆ្នាំ ២០២៤”។
លោកបានពណ៌នាការវាយប្រហារ ដោយអយុត្តិធម៌នោះថាជា “ទង្វើគួរឲ្យព្រួយបារម្ភដែលមិនសមស្រប ក្នុងទំនាក់ទំនងអន្តរជាតិ”។ ក្រសួងការបរទេសហ្វីលីពីន ក៏បានចេញសេចក្តីថ្លែងការណ៍មួយ កាលពីថ្ងៃសុក្រដោយនិយាយថា ខ្លួនបានដឹងអំពី “ឧប្បត្តិហេតុធ្ងន់ធ្ងរ” ។
ហ្វីលីពីនបានថ្កោលទោសយ៉ាងខ្ជាប់ខ្ជួន នូវការប្រើប្រាស់កម្លាំង ការឈ្លានពាន និងការបំភិតបំភ័យនៅក្នុងសមុទ្រចិនខាងត្បូង ហើយបានសង្កត់ធ្ងន់លើតម្រូវការសម្រាប់ តួអង្គក្នុងការអត់ធ្មត់ពិតប្រាកដ ៕
ប្រែសម្រួលៈ ណៃ តុលា
