ថៃ ៖ មួយគ្រួសារមានគ្នា៤នាក់ ប្តីប្រពន្ធ និងកូន២នាក់ ត្រូវបានបាញ់ចំក្បាល ស្លាប់ទាំងអស់

បរទេស៖ ប្ដីប្រពន្ធ និងកូនជំទង់ពីរនាក់ទៀត ត្រូវបានគេប្រទះឃើញស្លាប់ ដោយម្នាក់ៗត្រូវគេបាញ់ចំក្បាល នៅផ្ទះរបស់ពួកគេនៅស្រុក Muang នៃខេត្តភាគខាងត្បូង ប្រទេសថៃ កាលពីថ្ងៃចន្ទ។

យោងតាមសារព័ត៌មាន បាងកក ប៉ុស្តិ៍ ចេញផ្សាយនៅថ្ងៃទី៨ ខែតុលា ឆ្នាំ២០២៤ បានឱ្យដឹងថា លោកវរសេនីយ៍ឯក Bantoen Laocharoen នាយប៉ុស្តិ៍នគរបាល Muang Songkhla បាននិយាយថា អ្នកទូរស័ព្ទចូលរាយការណ៍ករណីឃាតកម្មដែលអាចទៅរួច មកកាន់លេខ 191 នៅម៉ោង 3.45 រសៀល។

ប៉ូលិសបានប្រញាប់ប្រញាល់ទៅកាន់អាសយដ្ឋានដែលបានផ្តល់នោះជាផ្ទះពីរជាន់នៅផ្ទះលេខ 56/5 ផ្លូវ Sai Buri ក្នុងក្រុង Songkhla ។

នៅក្នុងបន្ទប់ទទួលភ្ញៀវនៅជាន់ផ្ទាល់ដី ពួកគេបានរកឃើញសាកសពរបស់អតីតសមាជិកក្រុមប្រឹក្សាក្រុង Songkhla គឺលោក Chaichan Khwanseng អាយុ ៦១ឆ្នាំ និងកូនប្រុសរបស់គាត់ Khanet អាយុ ១៦ ឆ្នាំ។ នៅជាន់ទី២ ប៉ូលីសបានរកឃើញសាកសពនៅក្នុងបន្ទប់គេងដាច់ដោយឡែកពីគ្នា កូនស្រីរបស់គាត់ឈ្មោះ Kotwakorn អាយុ ១៨ ឆ្នាំ និងប្រពន្ធរបស់គាត់ឈ្មោះ Natpapat អាយុ ៤៧ ឆ្នាំ ដែលដៃរបស់គាត់កាន់កាំភ្លើងខ្លី 9mm ។

មេប៉ុស្តិ៍បាននិយាយថា មុននេះប្រពន្ធបានប្រាប់ប្អូនស្រីថានាងមានបញ្ហាបំណុល ។ ការស៊ើបអង្កេតរបស់ប៉ូលីសកំពុងបន្ត៕

ប្រែសម្រួលៈ ណៃ តុលា