ម៉ូស្គូ៖ តុលាការទីក្រុងមូស្គូ បានពិន័យក្រុមហ៊ុនផ្ញើសារ Telegram ចំនួន ៤លានរូប្លែ (ប្រហែល ៤១,៤០០ដុល្លារអាមេរិក) សម្រាប់ការបដិសេធមិនលុបព័ត៌មាន ដែលហាមប្រាមក្នុងប្រទេសរុស្ស៊ី។
តុលាការបានឲ្យដឹងនៅក្នុងសេចក្តីថ្លែងការណ៍មួយថា Telegram ត្រូវបានគេរកឃើញថា មានពិរុទ្ធពីបទប្រព្រឹត្តបទល្មើសរដ្ឋបាល ចំពោះការខកខានក្នុងការ “ដកចេញនូវព័ត៌មាននៅពេលដែលការដកចេញបែបនេះត្រូវបានទាមទារដោយច្បាប់រុស្ស៊ី” ។
តុលាការមិនបានបញ្ជាក់ពីព័ត៌មានហាមឃាត់ដែលនាំឲ្យមានការផាកពិន័យនោះទេ។ នៅក្នុងខែសីហា Telegram ត្រូវបានពិន័យជាប្រាក់ចំនួន ៤លានរូប្លែម្ដងរួចទៅហើយ សម្រាប់បទល្មើសស្រដៀងគ្នានេះ។
ជាមួយនឹងអតិថិជនប្រមាណ ៩០០លាននាក់ ហើយជាក់ស្ដែង បណ្ដាញ Telegram ឥឡូវនេះគឺជាវេទិកាផ្ញើសារឈានមុខគេរបស់ពិភពលោក និងមានឥទ្ធិពលបំផុតនៅក្នុងប្រទេសរុស្ស៊ី៕
ប្រែសម្រួល ឈូក បូរ៉ា
