ភ្នំពេញ៖ នៅសល់រយៈពេលតែ៦ថ្ងៃទៀតប៉ុណ្ណោះ ព្រះរាជពិធីបុណ្យអុំទុក បណ្តែតប្រទីប សំពះព្រះខែ អកអំបុកឆ្នាំ២០២៤ នឹងចាប់ផ្តេីមនៅមុខព្រះបរមរាជវាំង ក្នុងនាមជាម្ចាស់ផ្ទះ រដ្ឋបាលរាជធានីភ្នំពេញ កំពុងមមាញឹកលេីការពង្រឹងសន្តិសុខ សណ្តាប់ធ្នាប់ របៀបរៀបរយសាធារណៈ ក៏ដូចជាកែលំអរសោភណ្ឌភាពទីក្រុង ពិសេសនៅជុំវិញតំបន់ប្រារព្ធពិធី ដោយធានាថា ព្រះរាជពិធីបុណ្យអុំទូកនេះ ដំណេីរការទៅដោយរលូន ប្រកបដោយសន្តិសុខល្អ និងសោភណ្ឌភាព។
ក្នុងអង្គប្រជុំគណៈបញ្ជាការឯកភាព រដ្ឋបាលរាជធានីភ្នំពេញ ដើម្បីត្រៀមលក្ខណៈ រៀបចំព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក ឆ្នាំ២០២៤ នាព្រឹកថ្ងៃទី៨ វិច្ឆិកានេះ លោក ឃួង ស្រេង អភិបាលរាជធានីភ្នំពេញ បានគូសបញ្ជាក់ថា ក្នុងនាមជាម្ចាស់ផ្ទះ យើងត្រូវគិតគូរឱ្យបានគ្រប់ជ្រុងជ្រោយ ទាំងការគ្រប់គ្រងកម្លាំង ការងារសង្គ្រោះបន្ទាន់ បង្កើតទីបញ្ជាការស្រាល ក្នុងកិច្ចប្រតិបត្តិការណ៍ ការពារសន្តិសុខសុវត្ថិភាព ទប់ស្កាត់លំហូរចរាចរណ៍ ចំពោះរថយន្តមួយចំនួនចូលមកក្នុងរាជធានី ទប់ស្កាត់ជនអាណាថា ចោរលូកហោប៉ៅជាដើម និងការបង្ការទប់ស្កាត់ហានិភ័យ នៃគ្រោះអគ្គិភ័យ និងការគិតគូរពីអនាម័យបរិស្ថាន។
ជាមួយគ្នានេះ លោក ឃួង ស្រេង បានបញ្ជាក់ថា ព្រះរាជពិធីបុណ្យអុំទូកឆ្នាំនេះ ទាំងខាងក្នុងនិងក្រៅព្រះរាជពិធី កម្លាំងរបស់យើងត្រូវតែធានាឱ្យបាន សន្តិសុខ សុវត្ថិភាព១០០% ជូនព្រះមហាក្សត្រ, ថ្នាក់ដឹកនាំជាន់ខ្ពស់របស់ជាតិ និងប្រជាពលរដ្ឋ ដែលចូលមកដើរលេងកំសាន្ត ។
ក្នុងនោះនៅព្រឹកថ្ងៃទី១៤ វិច្ឆិកា លោកអភិបាលរាជធានី និងចុះទៅពិនិត្យទីតាំងទីបញ្ជាការស្រាល ដើម្បីពង្រឹងកម្លាំងឱ្យបានខ្លាំងក្លា។
លោក ឃួង ស្រេង ក៏បានលើកឡើងទៀតថា ទាំងកងកម្លាំងនិងសម្ភារៈផ្សេងៗ បើខ្វះខាតត្រូវរាយការណ៍ភ្លាម ដើម្បីយើងបានដោះស្រាយទាន់សភាពការណ៍ ធ្វើយ៉ាងណាឲ្យព្រះរាជពិធីបុណ្យអុំទូកឆ្នាំនេះ ដំណើរការទៅដោយរលូននិងទទួលបានជោគជ័យ។
ដើម្បីឱ្យការប្រារព្ធព្រះរាជពិធីនេះ ប្រព្រឹត្តទៅបានរលូន គ្មានការរារាំង ដល់ដំណើរការអង្គពិធី និងធានាបាននូវសន្តិសុខ សុវត្ថិភាព និងសណ្តាប់ធ្នាប់ របៀបរៀបរយសាធារណៈ គណៈបញ្ជាការឯកភាព រដ្ឋបាលរាជធានីភ្នំពេញ បានបង្កើតជាអនុគណៈកម្មការជាច្រើនផងដែរ មានដូចជា៖ អនុគណៈកម្មការសន្តិសុខ សុវត្ថិភាព សណ្តាប់ធ្នាប់សាធារណៈ សង្គ្រោះទូកលិច និងសង្គ្រោះបន្ទាន់, អនុគណៈកម្មការគ្រប់គ្រងទូក ទីលានប្រណាំងទូក និងទីកន្លែងស្នាក់នៅ របស់កីឡាករ-កីឡាការិនី, អនុគណៈកម្មការផ្គត់ផ្គង់ភស្តុភារ និងហិរញ្ញវត្ថុ, អនុគណៈកម្មការរៀបចំវេទិកា តុបតែងលម្អសោភណភាព និងការងារបរិស្ថាន-អនាម័យ និងអនុគណៈកម្មការរៀបចំប្រទីប ផ្សព្វផ្សាយព័ត៌មាន សិល្បៈ និងបដិសណ្ឋារកិច្ច។
គួរបញ្ជាក់ថា ក្នុងព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក ឆ្នាំ២០២៤ នឹងប្រព្រឹត្តទៅចំនួន៣ថ្ងៃ គឺនៅថ្ងៃទី១៤-១៥-១៦ ខែវិច្ឆិកា ឆ្នាំ២០២៤ មានទីតាំងនៅតាមដងទន្លេសាប ចាប់ពីស្ពានជ្រោយចង្វារ ដល់កោះពេជ្រ ក្រោមព្រះរាជាធិបតីភាពដ៏ខ្ពង់ខ្ពស់ ព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រនៃកម្ពុជា។
ព្រះរាជពិធីបុណ្យអុំទូកឆ្នាំនេះដែរ មានទូកចូលរួមប្រណាំង ចំនួន៣៤៦គ្រឿង ក្នុងនោះមានទូកអុំ ចំនួន ១៧០គ្រឿង ទូកចែវចំនួន ៤៥គ្រឿង (ទូកចែវនារី ០១គ្រឿង) ទូកខ្នាតអន្តរជាតិ ចំនួន ១៣១គ្រឿង (ទូកខ្នាតអន្តរជាតិនារី ០៣គ្រឿង)។ចំណុះទូក ចំនួន ២១,៩៤៦នាក់ ចំណុះបុរសចំនួន ១៧,៤៦៩នាក់ (បម្រុង ៤,២៦៩នាក់) ចំណុះនារីចំនួន ១០៦នាក់ (បម្រុង ១០២នាក់)។ ចំណែកទីតាំងស្នាក់នៅ របស់កីគឡាករអុំទូក មាន២ទីតាំង ៖ ទី១ ទីតាំងដីវាលទល់មុខរង្វង់មូលនាងមច្ឆា (OCIC ជ្រោយចង្វារ) និងទី២ ទីតាំងអតីតស្ថានីយប្រេងឥន្ធនៈសូគីមិច គីឡូម៉ែត្រលេខ៦ (ឫស្សីកែវ)។ ចំពោះប្រទីបដែលនឹងត្រូវបណ្តែត អបអរសាទរព្រះរាជពិធីបុណ្យ ចំនួន ៣៥ប្រទីប៕
