ភ្នំពេញ ៖ លោក ឃ្លាំង ហួត អភិបាលរងរាជធានីភ្នំពេញ បានណែនាំទៅកាន់អាជ្ញាធរខណ្ឌជ្រោយចង្វារ និងមន្ទីរសាធារណការ និងដឹកជញ្ជូនរាជធានីភ្នំពេញ ត្រូវពិនិត្យនិងដាក់សំណើររបស់ពលរដ្ឋ តំណាងអ្នកភូមិដើមគរ ដែលស្នើសុំបើកមុខផ្លូវចេញចូលភូមិ ជារបៀបវារៈបន្ទាន់ បន្ទាប់ពីមានការសាងសង់រំលោភលើផ្លូវ នាំឱ្យអ្នកភូមិ មានការពិបាក ក្នុងការចេញចូលភូមិ ។
ការដោះស្រាយបញ្ហាភ្លាមៗរបស់លោក ឃ្លាំង ហួត ជូនប្រជាពលរដ្ឋភូមិដើមគរ សង្កាត់ព្រែកតាសេកខាងលើនេះ ធ្វើឡើងបន្ទាប់ពីតំណាងពលរដ្ឋភូមិព្រែកតាសេក បានស្នើសុំផ្ទាល់មាត់ ក្នុងវេទិកាផ្សព្វផ្សាយ និងពិគ្រោះយោបល់ របស់ក្រុមប្រឹក្សារាជធានីភ្នំពេញ អាណត្តិទី៤ នៅខណ្ឌជ្រោយចង្វារ នាព្រឹកថ្ងៃទី២១ ខែវិច្ឆិកា ឆ្នាំ២០២៤ ដែលធ្វើឡើងក្នុងផ្សារ OCIC ។
វេទិកាខាងលើនេះ មានសមាជិកសមាជិកាក្រុមប្រឹក្សាខណ្ឌ សង្កាត់ និងប្រជាពលរដ្ឋ សរុប៤៦៦នាក់ចូលរួម និងបានលើកឡើងនូវសំណើរ និងសំណូមពរមួយចំនួន ជាក់ស្តែងសំណូមពរផ្ទាល់មាត់ មានចំនួន៨នាក់បានលើកឡើង និងមានជាលាយលក្ខណ៍អក្សរចំនួន ១៤សំបុត្រ ។
ភាគច្រើននៃសំណើររបស់ប្រជាពលរដ្ឋ ដែលបានលើកឡើង ផ្តោតទៅលើការស្នើសុំកសាង ហេរដ្ឋារចនាសម្ព័ន្ធផ្លូវខ្នល់ និងបង្គោលភ្លើងជាដើម ។ ដោយឡែក តំណាងពលរដ្ឋ មកពីភូមិដើមគរមួយរូប បានស្នើសុំមកកាន់អង្គវេទិកា ឱ្យជួយដោះស្រាយ លើផលវិបាក ក្នុងការធ្វើដំណើររបស់អ្នកភូមិ បន្ទាប់ពីផ្លូវលំបុរាណរបស់ភូមិ ត្រូវបានកាត់ផ្តាច់ បន្ទាប់ពីមានការអភិវឌ្ឍតំបន់នោះ ដោយស្នើអាជ្ញាធរជួយបើកមុខផ្លូវ និងសាងសង់ផ្លូវប៉េតុងជូន ដើម្បីងាយស្រួល ដល់អ្នកភូមិទាំងមូលធ្វើដំណើរ ។
បន្ទាប់ពីទទួលបានសំណើរពីពលរដ្ឋខាងលើ លោក ឃ្លាំង ហួត ដែលជាតំណាងលោក ឃួង ស្រេង អភិបាលរាជធានីភ្នំពេញ បានដោះស្រាយភ្លាមៗ និងបានប្រកាសគាំទ្រលើកិច្ចការងារខាងលើនេះ ដោយបានណែនាំឱ្យអាជ្ញាធរខណ្ឌជ្រោយចង្វារ និងមន្ទីរសាធារណការ និងដឹកជញ្ជូនរាជធានីភ្នំពេញ ចាត់ការដោះស្រាយកិច្ចការងារនេះជាបន្ទាន់ ។
លោក ឃ្លាំង ហួត មានប្រសាសន៍ថា “ទុករឿងនេះអត់បានទេ ព្រោះសង្កាត់ព្រែកតាសេកនេះ គឺជាសង្កាត់មួយដែលតែងគាំទ្រ រាជរដ្ឋាភិបាលគ្រប់អាណត្តិ របៀបវារៈបន្ទាន់ករណីនេះ ហើយត្រូវរាយការណ៍ ទៅរដ្ឋបាលរាជធានីភ្នំពេញឱ្យបានមុនដាច់ឆ្នាំនេះ” ។
លោក ឃ្លាំង ហួត បន្តថា “មិនដឹងអ្នកណានៅភ្នំពេញ ទៅសង់រំលោភផ្លូវតែម្តង មិនមែនក្រុមហ៊ុន OCIC នោះទេ កុំបន្ទោសOCIC គឺបន្ទោសម្ចាស់ដីមួយនោះ ប៉ុន្តែអ្នកណាក៏ដោយ នេះជាប្រយោជន៍រួមរបស់ប្រជាពលរដ្ឋ ដែលត្រូវយកចិត្តទុកដាក់ ហើយត្រូវរាយការណ៍ឱ្យខ្ញុំ ។ ខ្ញុំមកទីនេះទី១ តំណាងឯកឧត្តមអភិបាលរាជធានីភ្នំពេញ ទី២ក៏សុំប្រើសិទ្ធិក្រុមកាងារចុះខណ្ឌនេះ សូមយកចិត្តទុកដាក់រឿងនេះ ចឹងអភិបាលខណ្ឌ ប្រធានក្រុមប្រឹក្សានៅទីនេះ មើលរឿងនេះ” ។
លោកអភិបាលរង ក៏បានគូសបញ្ជាក់ថា “យើងទាំងអស់គ្នាបានរកឃើញ នូវបញ្ហាសំខាន់ៗជាអាទិភាព សម្រាប់ឱ្យរដ្ឋបាលរាជធានីភ្នំពេញ យកទៅធ្វើការពិចារណា កែលម្អ ក្នុងការអនុវត្តសកម្មភាពរបស់ខ្លួន ដើម្បីលើកកម្ពស់គុណភាព នៃជីវភាពរស់នៅរបស់ប្រជាពលរដ្ឋ ក្នុងរាជធានីភ្នំពេញ ជាពិសេស ប្រជាពលរដ្ឋក្រីក្រ ក្នុងមូលដ្ឋានសង្កាត់ ខណ្ឌរបស់ខ្លួនឱ្យកាន់តែមានភាពល្អប្រសើរ។ ការចូលរួមផ្តល់មតិយោបល់ និងការលើកឡើង នូវសំណើ និងសំណូមពររបស់អស់លោកលោកស្រី នាថ្ងៃនេះ គឺបាននាំមកនូវសក្តានុពលដ៏ធំធេង និងធ្វើឱ្យរដ្ឋបាលរាជធានីភ្នំពេញ អាចឆ្លុះបញ្ចាំងបាននូវចំណុចខ្វះខាត ចំណុចអសកម្ម ដែលបានអនុវត្តកន្លងមក និងអាចឱ្យគណៈអភិបាលរាជធានីភ្នំពេញ យកទៅពិចារណាធ្វើការកែលម្អឡើងវិញ ឱ្យបានសមស្របតាមសេចក្តីត្រូវការ របស់ប្រជាពលរដ្ឋ ក្នុងមូលដ្ឋាននីមួយៗ”។
ជាមួយគ្នានេះ លោក ជួប ខុន សមាជិកក្រុមប្រឹក្សារាជធានីភ្នំពេញ តំណាងលោក ម៉ប់ សារិន ប្រធានក្រុមប្រឹក្សារាជធានីភ្នំពេញ បានថ្លែងថា វេទិកាផ្សព្វផ្សាយ និងពិគ្រោះយោបល់ របស់ក្រុមប្រឹក្សារាជធានីភ្នំពេញ នាថ្ងៃនេះ នឹងផ្តល់ជូនដល់ប្រជាពលរដ្ឋ ក្នុងការចូលរួមដំណើរការអភិបាលកិច្ចល្អ និងជាឧបករណ៍មួយ សម្រាប់លើកកម្ពស់ គណនេយ្យភាព តម្លាភាព ក្នុងដំណើរ ការពិនិត្យមើល លើការផ្តល់សេវាសាធារណៈ របស់រដ្ឋបាលរាជធានីភ្នំពេញ រដ្ឋបាលខណ្ឌ រដ្ឋបាលសង្កាត់ ក្នុងគោលបំណង ដើម្បីធានាថា រាល់បញ្ហាអាទិភាព របស់ប្រជាពលរដ្ឋក្នុងមូលដ្ឋាន ត្រូវបានពិនិត្យ ដោះស្រាយ និងឆ្លើយតប ។ គ្រប់អ្នកពាក់ព័ន្ធទាំងអស់ក្នុងមូលដ្ឋាន ត្រូវបានរួមបញ្ចូលបរិយាប័ន នៅក្នុងដំណើរការនៃការអភិវឌ្ឍ តាមបែបប្រជាធិបតេយ្យនៅថ្នាក់ក្រោមជាតិផងដែរ ៕
