កង់បេរ៉ា ៖ ក្រុមហ៊ុនប្រព័ន្ធផ្សព្វផ្សាយសង្គម ដែលមិនរារាំង ប្រជាជនអូស្ត្រាលី ដែលមានអាយុក្រោម ១៦ ឆ្នាំពីការប្រើប្រាស់សេវាកម្ម របស់ពួកគេនឹងត្រូវប្រឈម នឹងការផាកពិន័យ រាប់សិបលានដុល្លារក្រោមច្បាប់ដំបូង របស់ពិភពលោក។
គណបក្សការងារគ្រប់គ្រង របស់ប្រទេសអូស្ត្រាលីនៅថ្ងៃព្រហស្បតិ៍នេះ បានដាក់ចេញច្បាប់ដល់សភា ដើម្បីដាក់កម្រិតអាយុអប្បបរមាត្រឹម ១៦ ឆ្នាំដើម្បីប្រើប្រាស់ប្រព័ន្ធផ្សព្វផ្សាយសង្គម។
នៅក្រោមច្បាប់នេះ ទំនួលខុសត្រូវ ក្នុងការអនុវត្តការកំណត់អាយុអប្បបរមា នឹងធ្លាក់ទៅលើក្រុមហ៊ុនប្រព័ន្ធផ្សព្វផ្សាយសង្គម ជាជាងកុមារ ឪពុកម្តាយ ឬអាណាព្យាបាល នេះបើយោងតាមការចុះផ្សាយ របស់ទីភ្នាក់ងារសារព័ត៌មានចិនស៊ិនហួ ។
ក្រុមហ៊ុនប្រព័ន្ធផ្សព្វផ្សាយសង្គម ដែលបរាជ័យជាប្រព័ន្ធក្នុងការអនុវត្តការ កំណត់អាយុនឹងត្រូវប្រឈម នឹងការផាកពិន័យរហូតដល់ ៥០លានដុល្លារអូស្ត្រាលី (៣២,៥ លានដុល្លារអាមេរិក)។
រដ្ឋមន្ត្រីក្រសួងទំនាក់ទំនងលោកស្រី Michelle Rowland បានប្រាប់សភានៅពេលរៀបចំច្បាប់នេះថា “នេះនិយាយអំពីការការពារយុវជន មិនមែនការដាក់ទណ្ឌកម្ម ឬដាក់ឱ្យនៅដាច់ដោយឡែកពីគេ និងឱ្យឪពុកម្តាយដឹងថា យើងស្ថិតក្នុងជ្រុងរបស់ពួកគេនៅពេលនិយាយអំពីការជួយដល់សុខភាព និងសុខុមាលភាពកូនរបស់ពួកគេ”។
លោកស្រីបញ្ជាក់ថា “ច្បាប់នេះស្វែង រកការកំណត់តម្លៃបទដ្ឋានថ្មីនៅក្នុងសង្គម ដែលថាការចូលប្រើប្រព័ន្ធផ្សព្វផ្សាយសង្គម មិនមែនជាលក្ខណៈកំណត់ នៃការធំឡើងនៅក្នុងប្រទេសអូស្ត្រាលី នោះទេ”៕
ប្រែសម្រួល ឈូក បូរ៉ា
