ភ្នំពេញ៖ ថ្ងៃទី១៣ ខែធ្នូ ឆ្នាំ២០២៤ ការិយាល័យតំណាងពាណិជ្ជកម្មខេត្តយូណាន ប្រចាំនៅភ្នំពេញ (ការិយាល័យតំណាងភ្នំពេញ) បានដឹកនាំភ្នាក់ងារចែកចាយផលិតផលកសិកម្មមានលក្ខណៈពិសេស ប្រចាំតំបន់ខ្ពង់រាបខេត្តយូណានជាច្រើនស្ថាប័នចូលរួម «ពិព័រណ៍ពាណិជ្ជកម្មកម្ពុជា» ដែលប្រារព្ធឡើងនៅរាជធានីភ្នំពេញ ដោយប្រមូលផ្តុំគ្នាជំរុញការផ្សព្វផ្សាយណែនាំផលិតផលកសិកម្ម មានលក្ខណៈពិសេសប្រចាំតំបន់ខ្ពង់រាបខេត្តយូណាន ដែលជួយជាកម្លាំងដល់ការអភិវឌ្ឍកិច្ចសហប្រតិបត្តិការសេដ្ឋកិច្ច ពាណិជ្ជកម្ម រវាងខេត្តយូណាន និងប្រទេសកម្ពុជា។
ផលិតផលមានលក្ខណៈពិសេសជិត២០ប្រភេទ ដែលដាក់តាំងបង្ហាញក្នុងពិព័រណ៌ បានទាក់ចិត្តភ្ញៀវកិត្តិយស និងអតិថិជនដែលអញ្ជើញទស្សនាពិព័រណ៌ ឱ្យមកភ្លក់រសជាតិ គយគន់ និងសាកសួរព័ត៌មាន ដូចជា៖ ផ្កាស្រស់សម្រាប់ដោតតុបតែងមកពីតំបន់តូវណាន(Dounan) ផ្កាកុលាបព្រះអាទិត្យស្រុកពីងឈួន(Binchuan) ផ្លែប៉ោមក្រុងចាវថង់(Zhaotong) ផ្លែយិនសិន(Ginseng)ស្រុកសឺលីន(Shilin) ផ្លែក្រូចផ្អែមភ្នំអាយឡៅ（Ailao Mountains) សណ្តែកដីពណ៌ ដំឡូងស្វាយផ្កាកុលាប តែភូអឺ(Pu’er tea) កាហ្វេគ្រាប់ល្អិតក្រុងប៉ាវសាន(Baoshan) នំផ្កាស្រស់យូណាន(Yunnan flower cake)។ល។
ថ្នាក់ដឹកនាំសំខាន់ៗបានអញ្ជើញទស្សនា ស្តង់ពិព័រណ៌ដោយផ្ទាល់ ដូចជា៖ លោក សុខ ចិន្តាសោភា ឧបនាយករដ្ឋមន្ត្រី លោកស្រី ចម និម្មល រដ្ឋមន្ត្រីក្រសួងពាណិជ្ជកម្ម។
លោកឧបនាយករដ្ឋមន្ត្រី និងលោកស្រីរដ្ឋមន្ត្រី បានទទួលស្គាល់គុណភាព ផលិតផលមានលក្ខណៈពិសេសប្រចាំតំបន់ខ្ពង់រាបប្រទេសចិន ដូចជា៖ ផ្កាស្រស់ និងផ្លែឈើខេត្តយូណាន ព្រមទាំងសម្តែងការស្វាគមន៍ចំពោះ ផលិតផលមានលក្ខណៈពិសេសប្រចាំខេត្តយូណាន ដែលមានគុណភាពល្អ “នាំចូល” មកកាន់ប្រទេសកម្ពុជា ឱ្យបានកាន់តែច្រើន ហើយក៏សង្ឃឹមថាក្រុមហ៊ុន និងសហគ្រាសខេត្តយូណានមកបណ្តាក់ទុនវិនិយោគលើវិស័យឧស្សាហកម្ម និងពាណិជ្ជកម្មនៅកម្ពុជាឱ្យបានកាន់តែច្រើនផងដែរ ដើម្បីគាំទ្រដល់ការអភិវឌ្ឍសេដ្ឋកិច្ចកម្ពុជា។
ការិយាល័យតំណាងភ្នំពេញ បាននិងកំពុងតែឆ្លើយតបយ៉ាងសកម្មចំពោះការជំរុញការអនុវត្តបទប្បញ្ញត្តិ ពាក់ព័ន្ធនឹងធុរកិច្ចក្រៅប្រទេសរបស់ខេត្តយូណាន នាអំឡុងពេលតាំងពិព័រណ៌ ការិយាល័យតំណាងភ្នំពេញបានជ្រើសរើស និងរៀបចំចងក្រងព័ត៌មានជាង២០អត្ថបទស្តីពីពាណិជ្ជកម្មនាំចេញនាំចូលរវាងខេត្តយូណាន និងកម្ពុជា ធ្វើឱ្យការងារជំរុញពាណិជ្ជកម្មដំណើរការទៅបានកាន់តែសុក្រឹត និងសម្បូរបែបថែមមួយកម្រិតទៀត ភ្នាក់ងារចែកចាយដែលចូលរួមតាំងពិព័រណ៌បានផ្គូផ្គងជាមួយអតិថិជន ដែលមានសក្កានុពលជាង១០ស្ថាប័ននៅនឹងស្តង់ពិព័រណ៌ដោយផ្ទាល់ ដែលជួយជាកម្លាំងដល់ជំហ៊ានបន្ទាប់នៃការ “នាំចូល” ផលិតផលមានលក្ខណៈពិសេសប្រចាំខេត្តយូណាន មកកាន់ទីផ្សារកម្ពុជាឱ្យបានកាន់តែល្អប្រសើរ។
«ពិព័រណ៍ពាណិជ្ជកម្មកម្ពុជា(CTE)» ដើមឡើយមានឈ្មោះថា «ពិព័រណ៍ ផលិតផលខ្មែរ និងទំនិញនាំចេញ-នាំចូល (CIEGE)» ដែលចាប់តាំង ពី ឆ្នាំ ២០០៦មក ត្រូវបានរៀបចំឡើងទទួលបានជោគជ័យចំនួន១៦លើក។ ពិព័រណ៌លើកនេះត្រូវបានធ្វើឡើងក្រោមមូលបទ៖ «យុគសម័យថ្មីនៃពាណិជ្ជកម្ម» ពិព័រណ៍នេះ មានរយៈពេល៤ថ្ងៃចាប់ពីថ្ងៃទី១៣ ដល់ថ្ងៃទី១៦ ខែធ្នូ ឆ្នាំ២០២៤ នៅមជ្ឈមណ្ឌលភីអេច ហ្គ្រេនហល បុរីប៉េងហួតបឹងស្នោ។ ក្រុមហ៊ុន អ្នកចែកចាយ និងអ្នកតំណាងធុរកិច្ច ចំណីអាហារ ផលិតផលសិប្បកម្ម ដែលចូលរួមជាអ្នកតាំងពិព័រណ៍ជិត២០០ស្ថាប័ន ដែលមានទាំងក្នុងស្រុក និងអាស៊ីអាគ្នេយ៍។ គោលបំណងនៃពិព័រណ៍លើកនេះ គឺជំរុញពាណិជ្ជកម្ម និងការវិនិយោគនៅកម្ពុជាឱ្យកាន់តែរស់រវើក ជួយជាកម្លាំងដល់ការអភិវឌ្ឍវិស័យឯកជន សកម្មក្នុងការពង្រីកបណ្តាញពាណិជ្ជកម្មសកលរបស់កម្ពុជា៕
