ភ្នំពេញ ៖ សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានថ្លែងថ្លែងអំណរគុណ ដល់សិល្បករ សិល្បការិនី និងកីឡាករ កីឡាការិនីទាំងអស់ ដែលបានចូលរួមចំណែក ក្នុងការកសាងខឿនការពារជាតិ តាមរយៈមូលនិធិកសាងហេដ្ឋារចនាសម្ព័ន្ធ តាមបណ្តោយព្រំដែន ផ្តោតលើការកសាង ផ្លូវក្រវាត់ព្រំដែន កន្លងទៅ ។
ក្នុងជំនួបសម្តែងការគួរសម និងពិភាក្សារការងារ ជាមួយសប្បុរសជន មកពីសមាគមសិល្បករខ្មែរ និងបណ្តាអង្គការ-សហព័ន្ធ និងក្លឹបកីឡា នៅវិមានសន្តិភាព នាព្រឹកថ្ងៃទី២៥ ខែធ្នូ ឆ្នាំ២០២៤នេះ សម្តេចធិបតី ហ៊ុន ម៉ាណែត បានគូសបញ្ជាក់ថា “សិល្បករ និងកីឡាករ មិនត្រឹមតែបានចូលរួមថែរក្សា និង លើកកម្ពស់វប្បធម៌ ប្រពៃណីដ៏ល្អផូផង់របស់ខ្មែរទេ តែការចូលរួមដោយទឹកចិត្ត ជាមួយរាជរដ្ឋាភិបាល គឺជាទឹកចិត្តដ៏ល្អប្រពៃ ក្នុងការលើកកម្ពស់ស្មារតីស្នេហាជាតិ និងចែករំលែកក្តីស្រលាញ់របស់ខ្លួន រួមជាមួយនឹងការអភិវឌ្ឍ និងកសាងផ្លូវនៅតាមបណ្តោយព្រំដែន ដែលបង្កើតបានការរីកចំម្រើនថ្មីបន្ថែមផង និងក្លាយជាខឿនការពារជាតិ រឹងមាំយូរអង្វែងផងដែរ” ៕
