ព្រៃវែង ៖ សម្ដេចក្រឡាហោម ស ខេង ឧត្តមប្រឹក្សាផ្ទាល់ព្រះមហាក្សត្រ បានជំរុញមន្ដ្រិអប់រំនៅខេត្តព្រែវែងទាំងអស់ ជួយទំនុកបម្រុង និងផ្តល់ឱកាស ដល់កុមារជួបការលំបាក និងងាយរងគ្រោះ បានចូលរៀន និងបន្តរៀន ពិសេសជួយសិស្ស រៀនយឺត ឱ្យទទួលបាននូវការសិក្សាកាន់តែប្រសើរ។
ក្នុងពិធីសម្ពោធដាក់ឲ្យប្រើប្រាស់ជាផ្លូវការអគារសាលាបឋមសិក្សា ហ៊ុន សែន កំចាយមារ នៃមជ្ឈមណ្ឌលអប់រំ និងបណ្ដុះបណ្ដាល ជា ស៊ីម កំចាយមារ ខេត្តព្រៃវែង នៅថ្ងៃទី១៦ ខែមករា ឆ្នាំ២០២៥ សម្ដេចក្រឡាហោម ស ខេង បានផ្តាំផ្ញើលើចំណុចមួយចំនួនថា រដ្ឋបាលខេត្ត មន្ទីរអប់រំ យុវជន និងកីឡា រដ្ឋបាលស្រុក ត្រូវបន្តចូលរួមគាំទ្រ និងសម្របសម្រួលទាំងរដ្ឋបាល និងបច្ចេកទេស ដល់ដំណើរការរៀន និងបង្រៀននៅ គ្រប់គ្រឹះស្ថានសិក្សា សាធារណៈទាំងក្នុងខេត្ត និងស្រុករបស់ខ្លួន។
សម្ដេចក្រឡាហោម គូសបញ្ជាក់ថា «គណៈគ្រប់គ្រង លោកគ្រូ អ្នកគ្រូ បុគ្គលិកអប់រំទាំងអស់ ត្រូវយកចិត្ត ទុកដាក់បន្ថែមទៀតលើការគ្រប់គ្រងសាលារៀន ជាពិសេសការជួយទំនុកបម្រុង និង ការផ្តល់ឱកាសដល់កុមារ ជួបការលំបាក និងងាយរងគ្រោះបានចូលរៀន និងបន្តរៀន ជួយសិស្សរៀនយឺតឱ្យទទួលបាននូវការសិក្សាកាន់តែប្រសើរ»។
សម្ដេចក្រឡាហោម បន្ដថា ក្នុងនាមជាអ្នកផ្តល់ សេវាអប់រំ គណៈគ្រប់គ្រង លោកគ្រូ អ្នកគ្រូ ត្រូវតែ បន្តអភិវឌ្ឍសមត្ថភាព ជាប់ជា ប្រចាំតាមរយៈការចូលរួមសិក្ខាសាលា វគ្គបំប៉ននានា ដូចជា វគ្គបំប៉នស្តីពីការអនុវត្ត កញ្ចប់សម្ភារៈអំណាន និងគណិតវិទ្យាថ្នាក់ដំបូង និងការគ្រប់គ្រងសាលារៀន ជាដើម។ ជាមួយគ្នានេះ ឆ្លើយតបនឹងការវិវត្តិបច្ចេកវិទ្យាព័ត៌មាន ដើម្បីបម្រើការបង្រៀន និង រៀន និងការងាររដ្ឋបាលឱ្យកាន់តែល្អប្រសើរ ព្រមទាំងសមត្ថភាពភាសាបរទេស ជាពិសេស ភាសាអង់គ្លេស។
សម្ដេចក្រឡាហោម ស ខេង បន្ថែមទៀតថា ត្រូវខិតខំគោរពប្រតិបត្តិឱ្យបានខ្ជាប់ខ្ជួននូវស្តង់ដាវិជ្ជាជីវៈ គ្រូបង្រៀន ដែលរួមមាន៖ ១-ចំណេះដឹងវិជ្ជាជីវៈ, ២-ការប្រតិបត្តិវិជ្ជាជីវៈ, ៣-ការ សិក្សាវិជ្ជាជីវៈ និង ៤-សីលធម៌វិជ្ជាជីវៈ។ មាតាបិតា អាណាព្យាបាល សូមចូលរួមតាមដានលទ្ធផលសិក្សា, អត្តចរិត, សីលធម៌, សុជីវធម៌របស់កូនជាដើម។
បន្ថែមពីនេះ មាតាបិតា អ្នកអាណាព្យាបាល ត្រូវផ្គត់ផ្គង់សម្ភារៈសិក្សា, ទិញកញ្ចប់សម្ភារៈអំណាន និងគណិតវិទ្យាថ្នាក់ដំបូង ឱ្យកូនបានហ្វឹកហាត់នៅសាលា និងនៅផ្ទះ, ចូលរួមគាំទ្រជាសម្ភារៈ ថវិកាដល់ដំណើរការ បណ្ណាល័យក្នុងសាលារៀន, ការអភិវឌ្ឍសាលារៀន និងបន្តគាំទ្រគ្រូបង្រៀនជាដើម៕
