ស្វាយរៀង ៖ កម្លាំងនគរបាល ស្រុកស្វាយជ្រំ បានធ្វើការឃាត់ខ្លួនក្មេងទំនើងចំនួន៣ នាក់ ដែលធ្វើសកម្មភាពបង្ហោះម៉ូតូ តាមផ្លូវសាធារណៈយកមកធ្វើការអប់រំ រីឯវត្ថុតាងទុករយៈពេល៣ ខែ។
លោកវរសេនីយ៍ឯក សោម សុភ័ណ្ឌ អធិការនគរបាលស្រុកស្វាយជ្រំបានឱ្យដឹងថា នៅថ្ងៃទី២៩ខែមករាឆ្នាំ២០២៥ វេលាម៉ោង៨និង៣០នាទី កម្លាំងប៉ុស្តិ៍នគរបាលរដ្ឋបាលក្រោលគោ បានចេញល្បាតចល័ត តាមភូមិសាស្រ្ត ក្នុងឃុំក្រោលគោ ក៏បានទទួលព័ត៌មានពីប្រជាពលរដ្ឋថា មានក្មេងទំនើងកំពុងជិះម៉ូតូបង្ហោះ នៅតាមផ្លូវស្ថិតនៅភូមិព្រៃខ្លា ឃុំក្រោលគោ ស្រុកស្វាយជ្រំ។
ពេលទទួលព័ត៌មាន បានភ្លាមកម្លាំងប៉ុស្តិ៍ នគរបាលរដ្ឋបាលក្រោលគោ បានចុះដល់កន្លែងកើតហេតុ ព័ទ្ធស្ទាក់ឃាត់ខ្លួនក្មេងទំនើងបាន១នាក់ឈ្មោះជិន ទុយ ភេទប្រុស អាយុ១៩ឆ្នាំ ជនជាតិខ្មែរ មុខរបរលក់ដូរ មានទីលំនៅភូមិឬស្សីជួរខាងត្បូង ឃុំក្រោលគោ ស្រុកស្វាយជ្រំ បាននាំខ្លួនមកអធិការដ្ឋាន នគរបាលស្រុកស្វាយជ្រំ ដើម្បីសាកសួរ នៅចំពោះមុខសមត្ថកិច្ចខ្លួនបានឆ្លើយសារភាពថាខ្លួនបានជិះម៉ូតូម៉ាកធូដេឌុបឈ្មោះ ជិន ឃួច ភេទប្រុស អាយុ១៥ឆ្នាំ ជនជាតិខ្មែ មុខរបរលក់ដូរមានទីលំនៅ នៅភូមិឃុំជាមួយគ្នា ឆ្លើយថាខ្លួនពិតជាបានជិះម៉ូតូបង្ហោះនៅលើផ្លូវស្ថិតនៅភូមិព្រៃខ្លា ឃុំក្រោលគោ ពិតមែន ។
លោកបានបន្តថា បន្ទាប់មកសមត្ថកិច្ច បានធ្វើការស្រាវជ្រាវឃាត់ខ្លួនក្មេងទំនើង បានចំនួន២នាក់ទៀតបន្ថែមទៀត ដោយ ទី១.ឈ្មោះជិន ឃួច ភេទប្រុស អាយុ១៥ឆ្នាំជនជាតិខ្មែរមុខរបរលក់ដូរ មានទីលំនៅភូមិឬស្សី ជួរខាងជើង ឃុំក្រោលគោ បានឆ្លើយសារភាពថា ខ្លួនក៏ធ្លាប់ជិះម៉ូតូបង្ហោះ បានចំនួន២លើកនៅភ្នំពេញដែរ ។
២.ឈ្មោះ ហ៊ុល វណ្ណ ភេទប្រុស អាយុ១៦ឆ្នាំជនជាតិខ្មែរ មុខរបរសិស្សមានទីលំនៅភូមិក្បាលទំនប់ សង្កាត់បឹងជប៉ុន ខ័ណ្ឌមានជ័យ រាជធានីភ្នំពេញ បានឆ្លើយសារភាពថា ពេលក្រុមបក្សពួកខ្លួនធ្វើសកម្មភាព ជិះម៉ូតូបង្ហោះនោះខ្លួនជាអ្នកជិះម៉ូតូ កាន់ទូរស័ព្ទតាមថតរូបភាព។
សូមបញ្ជាក់ថា វត្ថុតាងដកហូត ម៉ូតូចំនួន៣គ្រឿង ក្រោយពីបានស្តាប់ការបំភ្លឺពីក្មេងទំនើង ទាំង៣នាក់រួចហើយ លោកអធិការនគរបាលស្រុកស្វាយជ្រំ បានរាយការណ៍ជូនលោកឧត្តមសេនីយ៍ទោ ស្នងការ និងបានសុំ យោប់លលោកខាំ សុផារី ព្រះរាជអាជ្ញាអមសាលាដំបូង ខេត្តស្វាយរៀង ឃាត់ខ្លួនក្មេងទំនើងទាំង៣នាក់ នៅអធិការដ្ឋាននគរបាល ស្រុកស្វាយជ្រំ ដើម្បីធ្វើកិច្ចសន្យាអប់រំ និងអោយអាណាព្យាបាល ធ្វើលិខិតធានាយកទៅផ្ទះវិញ ដើម្បីអប់រំបន្ត ។ ចំពោះវត្ថុតាងម៉ូតូដកហូតរក្សាទុកនៅអធិការដ្ឋាន គរបាលស្រុកស្វាយជ្រំចំនួន៣ខែ ៕
