ភ្នំពេញ ៖ ក្នុងឆ្នាំ២០២៤ កន្លងទៅ អង្គភាពច្រកចេញ ចូលតែមួយរាជធានី ខេត្ត បានផ្តល់សេវារដ្ឋបាលសរុបចំនួន ៨៨៥.១១៧ សេវា និងទទួលបានចំណូលសរុបចំនួន ១៣០.៣៦៩.០៦៣.០២១រៀល ស្មើនឹង ៣២.៥៩២.២៦៥,៧៥ ដុល្លារអាមេរិក។
នេះបើយោងតាមរបាយការណ៍លទ្ធផល នៃចលនាប្រឡងប្រណាំង អនុវត្តគោលនយោបាយ «ភូមិ-ឃុំ-សង្កាត់ មានសុវត្ថិភាព» ប្រចាំឆ្នាំ២០២៤ និងទិសដៅ ឆ្នាំ២០២៥ ស្ថិតក្នុងដែនសមត្ថកិច្ចរបស់ ក្រសួងមហាផ្ទៃ បានបង្ហាញ ក្នុងពិធីបើកសន្និបាតត្រួតពិនិត្យលទ្ធផលការងារ ឆ្នាំ២០២៤ និងលើកទិសដៅការងារ ឆ្នាំ២០២៥ របស់ក្រសួងមហាផ្ទៃ ក្រោមអធិបតីភាព លោក ឧបនាយករដ្ឋមន្ដ្រី ស សុខា រដ្ឋមន្ដ្រីក្រសួងមហាផ្ទៃ នាព្រឹកថ្ងៃទី១២ ខែកុម្ភៈ ឆ្នាំ២០២៥ នៅទីស្ដីការក្រសួងមហាផ្ទៃ។
ក្នុងរបាយការណ៍ដដែល បានឱ្យដឹងថា ក្នុងឆ្នាំ២០២៤ ការផ្តល់សេវារដ្ឋបាល តាមយន្តការច្រកចេញចូលតែមួយ នៅរដ្ឋបាលថ្នាក់ក្រោមជាតិ ទទួលបានលទ្ធផល ដូចខាងក្រោម៖
១- អង្គភាពច្រកចេញចូលតែមួយរាជធានី ខេត្ត ៖ បានផ្តល់សេវារដ្ឋបាល សរុបចំនួន ៨៨៥.១១៧ សេវា និងទទួលបានចំណូលសរុបចំនួន ១៣០.៣៦៩.០៦៣.០២១រៀល (ស្មើនឹង ៣២.៥៩២.២៦៥,៧៥ ដុល្លារអាមេរិក)។
២- ការិយាល័យច្រកចេញចូលតែមួយក្រុង ស្រុក ខណ្ឌ ៖ បានផ្តល់សេវារដ្ឋបាលសរុបចំនួន ៤.៣២១.២៣១សេវា និងទទួលបានចំណូលសរុបចំនួន ១១.៣៣៩.៤៧០.៦០៤រៀល (ស្មើនឹង ២.៨៣៤.៨៦៧,៦៥ដុល្លារអាមេរិក)។
៣- យន្តការច្រកចេញ ចូលតែមួយឃុំ សង្កាត់៖ ក្រសួងមហាផ្ទៃបានដាក់ឱ្យអនុវត្តយន្តការច្រកចេញ ចូលតែមួយ នៃរដ្ឋបាលឃុំ សង្កាត់នៅពាក់កណ្តាលឆ្នាំ២០២២ និងបានណែនាំឱ្យរដ្ឋបាលរាជធានី ខេត្ត និងរដ្ឋបាលក្រុង ស្រុក ខណ្ឌជួយគាំទ្រដល់ដំណើរការរៀបចំ និងផ្តល់សេវារដ្ឋបាលនៅតាម យន្តការច្រកចេញចូលតែមួយ នៃរដ្ឋបាលឃុំ សង្កាត់របស់ខ្លួន ។ របាយការណ៍ នៃការផ្តល់សេវា រដ្ឋបាលរបស់យន្តការច្រកចេញ ចូលតែមួយនៃរដ្ឋបាលឃុំ សង្កាត់ ត្រូវបានដាក់បញ្ចូលនៅក្នុង របាយការណ៍វឌ្ឍនភាព របស់រដ្ឋបាលរាជធានី ខេត្តសាមីនីមួយៗ។
ទន្ទឹមនេះ ការិយាល័យប្រជាពលរដ្ឋ នៅថ្នាក់រាជធានី ខេត្ត បានទទួលបណ្ដឹង និងព័ត៌មានផ្សេងៗពី ប្រជាពលរដ្ឋ សរុបចំនួន១.៦០២ករណី ដែលក្នុងនោះបណ្តឹង ក្នុងសមត្ថកិច្ចចំនួន៤៤០ករណី (បានបញ្ចប់ ការដោះស្រាយ ចំនួន២២៩ករណី និង កំពុងដោះស្រាយចំនួន២១១ករណី) បណ្ដឹងក្រៅ សមត្ថកិច្ចចំនួន ៣២៦ករណី និងព័ត៌មានផ្សេងៗ ចំនួន៨៣៦ករណី (ការសរសើរចំនួន១៧១ករណី សំណើនិងសំណូមពរចំនួន ២៥២ករណី និងការសាកសួរព័ត៌មានចំនួន ៤១៣ករណី) ៕
