បរទេស៖យោងតាមការចេញផ្សាយរបស់ RT ប្រធានាធិបតីអាមេរិក លោក Donald Trump បានសម្តែងការបើកចំហចំពោះដំណើរទស្សនកិច្ចទៅកាន់ប្រទេសរុស្ស៊ី ដោយរំពឹងលើវឌ្ឍនភាពក្នុងការចរចាសន្តិភាព ដើម្បីបញ្ចប់ជម្លោះអ៊ុយក្រែន។
ប្រភពដដែលបានឲ្យដឹងទៀតដែរថាលោក Trump បានថ្លែងដូច្នេះក្នុងអំឡុងពេលសន្និសីទកាសែតរួមជាមួយប្រធានាធិបតីបារាំង Emmanuel Macron ក្នុងទីក្រុងវ៉ាស៊ីនតោនកាលពីថ្ងៃចន្ទ។
នៅពេលអ្នកសារព័ត៌មានសួរអំពីផែនការរបស់គាត់ក្នុងដំណើរទស្សនកិច្ចនៅទីក្រុងមូស្គូ លោក Trump បានឆ្លើយតបថា ៖ប្រសិនបើអ្វីៗទាំងអស់ត្រូវបានដោះស្រាយ ដែលខ្ញុំគិតថាវានឹងប្រាកដ ខ្ញុំនឹងទៅទីនោះ ហើយគាត់ក៏នឹងមកទីនេះផងដែរ។
ការលើកឡើងរបស់លោក Trump គឺបានសំដៅទៅលើប្រធានាធិបតីរុស្ស៊ី លោក Vladimir Putin ដែលក៏នឹងអាចធ្វើទស្សនកិច្ចមកកាន់សហរដ្ឋអាមេរិកវិញផងដែរ។
ឆ្លើយតបទៅនឹងសំណួរមួយទៀតអំពីការចូលរួមក្នុងការប្រារព្ធទិវាជ័យជំនះរបស់រុស្ស៊ីនៅថ្ងៃទី៩ខែឧសភា លោក Trump បានកត់សម្គាល់ថាកាលបរិច្ឆេទគឺវាឆាប់ពេកហើយប៉ុន្តែដំណើរទស្សនកិច្ចនឹងកើតឡើង នៅពេលសមស្របហើយ ប្រធានាធិបតីអាមេរិកបានបន្ថែមថា លោករំពឹងថាជម្លោះអ៊ុយក្រែននឹងបញ្ចប់ក្នុងរយៈពេលប៉ុន្មានសប្តាហ៍ទៀតប៉ុណ្ណោះ៕
ប្រែសម្រួល៖ស៊ុនលី
