ភ្នំពេញ៖ សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានអំពាវនាវ ដល់ប្រជាពលរដ្ឋ ជាពិសេសយុវជន ដែលប្រើប្រាស់ប្រព័ន្ធបណ្តាញសង្គម មិនថាFacebook ឬ TikTok ក្តី ធ្វើជាវេទិកាជេរប្រមាថគ្នា ខណៈពេលដែលមានអ្វីកើតឡើង មិននិយាយគ្នាដោះស្រាយបញ្ហា បែជាយកទៅដាក់លើបណ្តាញសង្គម បង្ករការស្មុកស្មាញដល់អ្នកដទៃ ។
ក្នុងឱកាសអញ្ជើញជាអធិបតី “ទិវាវប្បធម៌ជាតិ ៣មីនា លើកទី២៧ ឆ្នាំ២០២៥” និងសំណេះសំណាល ជាមួយសិល្បករសិល្បការិនីទូទាំងប្រទេស លើកទី៦ នារសៀលថ្ងៃទី៥ ខែមីនា ឆ្នាំ២០២៥ នៅមជ្ឈមណ្ឌលសន្និបាត និងពិព័រណ៍កោះពេជ្រ សម្តេចធិបតី ហ៊ុន ម៉ាណែត បានលើកឡើងថា បើមានរឿងអ្វីបន្តិចបន្តួចរវាងគ្នានឹងគ្នា ត្រូវរួមគ្នាដោះស្រាយភ្លាមៗឱ្យបានឆាប់ កុំបាច់រំខានអ្នកដទៃ ឬពឹងពាក់ស្វះស្វែងរកអន្តរាគមន៍ ពីអ្នកដទៃនោះឡើយ ។
សម្តេចធិបតី មានប្រសាសន៍ថា “ខ្ញុំសូមអំពាវនាវឱ្យប្រជាពលរដ្ឋយើង ជាពិសេសយុវជន ការប្រើប្រាស់ប្រព័ន្ធ Social Media ការប្រាស់ Facebook ការប្រើប្រាស់ TikTok ជាមធ្យោបាយល្អ ក្នុងការផ្សព្វផ្សាយ ប៉ុន្តែសូមពិចារណា សូមកុំឱ្យយកឧបករណ៍ ទៅជាមិត្តជិតស្និទរបស់យើង ដែលយើងផ្តាច់ទំនាក់ទំនងការនិយាយគ្នា ជាមួយអ្នកដែលនៅជុំវិញខ្លួនយើង ជាពិសេសពេលដែលមានហេតុការណ៍ យើងលែងនិយាយគ្នា ដោះស្រាយបញ្ហា សូមឱ្យប្រកាន់នូវអភិក្រម មានអ្វីនិយាយគ្នា ដោះស្រាយគ្នា រួមគ្នាខ្មែរជាខ្មែរទៅ” ។
ការលើកឡើងរបស់សម្តេចធិបតី ពាក់ព័ន្ធនឹងករណីខាងលើនេះ ត្រូវបានសម្តេចចាត់ទុកជារឿងចាំបាច់ ខណៈដែលបានកើងឡើង និងបានឃើញរាល់ថ្ងៃនៅក្នុងសង្គមនាពេលបច្ចុប្បន្ន ។
សម្តេចធិតី បន្ថែមថា “ហើយរឿងខ្លះ អត់ធំសោះ តែវិវត្តន៍ទៅជាធំ ដោយអ្នកពាក់ព័ន្ធមិននិយាយគ្នា ឈ្នះរៀងៗខ្លួនទីបំផុត គឺធ្វើឱ្យមហាជនកាន់តែវល់ កាន់តែស្មុកស្មាញអារម្មណ៍ផ្លូវចិត្ត ឃើញតែរឿងប្រទាក់ក្រឡាគ្នា ហើយពេលខ្លះ ជេដល់ទៅរាជរដ្ឋាភិបាលទៅទៀត អត់ទាំងដឹងអីផង” ។
សម្តេចធិបតី ក៏បានសូមយកឱកាស ដែលពាក់ព័ន្ធសិល្បធម៌ និងវប្បធម៌ ដែលជាមូលដ្ឋាននៅក្នុងការរស់នៅប្រចាំថ្ងៃ ដោយឱ្យចូលរួមថែរក្សាអំពីវប្បធម៌ នៃការប្រាស្រ័យទាក់ទងគ្នា ការនិយាយគ្នា រវាងប្រជាជន និងប្រជាជន ដោយកុំជេគ្នា មានអ្វីនិយាយគ្នា កុំដាក់តាម Facebook ឱ្យអ្នកមិនដឹងរឿងមកក្តៅក្រហាយជាមួយ ដោយត្រូវនិយាយគ្នាដោះស្រាយជាមួយគ្នា រកវិធីនិយាយគ្នា ឱ្យឆាប់បញ្ចប់រឿងដោយការយោគយល់គ្នា៕
