សេអ៊ូល៖ សម្ព័ន្ធមិត្តបានឲ្យដឹងថា ប្រទេសកូរ៉េខាងត្បូង និងសហរដ្ឋអាមេរិក នឹងចាប់ផ្តើមសមយុទ្ធយោធាប្រចាំឆ្នាំដ៏សំខាន់មួយនៅសប្តាហ៍ក្រោយ ដើម្បីបង្កើនសមត្ថភាពការពាររួមគ្នារបស់ពួកគេប្រឆាំងនឹងការគំរាមកំហែងផ្នែកយោធារបស់កូរ៉េខាងជើង។ សមយុទ្ធ Freedom Shield នឹងធ្វើឡើងពីថ្ងៃច័ន្ទ ដល់ថ្ងៃទី២០ ខែមីនា ដែលពាក់ព័ន្ធនឹងសមយុទ្ធក្លែងធ្វើ និងការហ្វឹកហ្វឺននៅលើទីលាន។
សេចក្ដីថ្លែងការណ៍រួមមួយបានឲ្យដឹងថា “អង្គភាពកូរ៉េខាងត្បូង និងសហរដ្ឋអាមេរិកនឹ ងអនុវត្តលំហាត់ហ្វឹកហ្វឺនបន្តផ្ទាល់ដែនទាំងអស់រួមគ្នានៅទូទាំងដែនដី សមុទ្រ ដែនអាកាស អ៊ិនធឺណិត និងដែនលំហ ដែលរួមបញ្ចូលគ្នានៅក្នុងសេណារីយ៉ូសមយុទ្ធនេះ ដើម្បីពង្រឹងអន្តរប្រតិបត្តិការ” ដោយប្រើអក្សរកាត់នៃឈ្មោះផ្លូវការរបស់ប្រទេសកូរ៉េខាងត្បូង គឺ សាធារណរដ្ឋកូរ៉េ។
សមយុទ្ធនេះនឹងជួយសម្ព័ន្ធមិត្តពង្រឹងឥរិយាបថការពាររួមបញ្ចូលគ្នារបស់ពួកគេចំពេល “ការគំរាមកំហែងជាក់ស្តែង” និងបញ្ហាប្រឈមដែលកំពុងវិវត្ត រួមទាំងកិច្ចសហប្រតិបត្តិការយោធាដែលកំពុងកើនឡើងរបស់កូរ៉េខាងជើងជាមួយរុស្ស៊ីផងដែរ។ សមយុទ្ធនៅសប្តាហ៍ក្រោយនឹងកត់សម្គាល់សមយុទ្ធយោធាដ៏សំខាន់ លើកដំបូងរបស់សម្ព័ន្ធមិត្តចាប់តាំងពីប្រធានាធិបតីអាមេរិកលោក ដូណាល់ ត្រាំ ចូលកាន់តំណែងក្នុងខែមករា។
កូរ៉េខាងជើង បានថ្កោលទោសសមយុទ្ធយោធារួមរបស់សម្ព័ន្ធមិត្តជាយូរមកហើយថា ជាការហាត់សមសម្រាប់ការឈ្លានពានប្រឆាំងនឹងខ្លួន ហើយអាចឆ្លើយតបដោយការធ្វើតេស្តអាវុធដូចជាការបាញ់មីស៊ីលជាដើម។ កូរ៉េខាងត្បូង និងសហរដ្ឋអាមេរិកបានឲ្យដឹងថា សមយុទ្ធរបស់ពួកគេ គឺការពារធម្មជាតិ។
កាលពីថ្ងៃអង្គារលោកស្រី គីម យ៉ូជុង ដែលជាប្អូនស្រីដ៏មានឥទ្ធិពលរបស់មេដឹកនាំកូរ៉េខាងជើងលោក គីម ជុងអ៊ុ បានគំរាមកំហែងការឆ្លើយតបផ្នែកយោធា ចំពោះការមកដល់នៃនាវាផ្ទុកយន្តហោះអាមេរិក នៅក្នុងប្រទេសកូរ៉េខាងត្បូង កាលពីដើមសប្តាហ៍នេះ។ កូរ៉េខាងជើង តែងតែមានប្រតិកម្មយ៉ាងខឹងសម្បារ ចំពោះការដាក់ពង្រាយផ្នែករឹងយោធាសំខាន់ៗរបស់សហរដ្ឋអាមេរិកទៅកាន់កូរ៉េខាងត្បូង ដោយចោទប្រកាន់ក្រុងវ៉ាស៊ីនតោនថា បង្កើនភាពតានតឹងនៅឧបទ្វីបកូរ៉េ៕
ប្រែសម្រួល ឈូក បូរ៉ា
