ចិន ប្រកាសយុត្តាធិការអធិបតេយ្យភាពលើថ្មប៉ប្រះទឹក នៅសមុទ្រចិនខាងត្បូង ចំពេលហ្គេមសង្គ្រាមរវាងអាមេរិក និងហ្វីលីពីន

ប៉េកាំង៖ ឆ្មាំសមុទ្រចិន បានលើកទង់ជាតិចិនលើថ្មប៉ប្រះទឹក នៅលើកោះ Spratly ដែលមានជម្លោះជាលើកដំបូងក្នុងរយៈពេលជាច្រើនឆ្នាំ នេះបើយោងតាមការចុះផ្សាយរបស់ ទីភ្នាក់ងារសារព័ត៌មានរុស្ស៊ី Sputnik។

ប្រទេសចិនបានប្រកាស “យុត្តាធិការអធិបតេយ្យភាព” លើថ្មប៉ប្រះទឹក Sandy Cay នេះបើយោងតាមរបាយការណ៍របស់ប្រព័ន្ធផ្សព្វផ្សាយចិន CCTV នៅថ្ងៃទី២៦ ខែមេសា។ ថ្មប៉ប្រះទឹកនេះស្ថិតនៅចម្ងាយជាច្រើនគីឡូម៉ែត្រពីកោះ Thitu ដែលត្រូវបានប្រើប្រាស់ដោយឆ្មាំសមុទ្រហ្វីលីពីន តាំងពីឆ្នាំ២០២៣ ដើម្បីតាមដានសកម្មភាពរបស់ចិន នៅក្នុងតំបន់នោះ។

ការទាមទាររបស់ចិនចំពោះកោះ Sandy Cay ផ្តល់ប្រសិទ្ធភាពដល់ប្រទេសនេះ នូវទឹកដីដែនសមុទ្រចម្ងាយ ១២ ម៉ាយ ដែលត្រួតលើគ្នាជាមួយកោះ Thitu នេះ កាសែត Financial Times បានរាយការណ៍ដោយលើកឡើងពីការ ព្រួយបារម្ភអំពីការកើនឡើងភាពតានតឹងរវាងចិន និងហ្វីលីពីន។

ចំណាត់ការរបស់ចិនបានកើតឡើងចំពេលដែលសមយុទ្ធ Balikatan ដែលជាសមយុទ្ធកងទ័ពជើងទឹករួមគ្នារវាងសហរដ្ឋអាមេរិក និងហ្វីលីពីន ដែលជាសមយុទ្ធប្រចាំឆ្នាំដ៏ធំបំផុត ដែលផ្តោតលើការការពារឆ្នេរ និងការ ដណ្តើមយកកោះហ្វឹកហ្វឺន ។ សមយុទ្ធនេះក៏ធ្វើឡើងនៅផ្នែកខ្លះនៃសមុទ្រចិនខាងត្បូង ដែលទីក្រុងប៉េកាំងទាមទារស្ទើរតែទាំងស្រុង។

សហរដ្ឋអាមេរិក និងហ្វីលីពីនបានពង្រឹង កិច្ចសហប្រតិបត្តិការយោធាចាប់តាំងពីឆ្នាំ២០២២ ក្រោមការគ្រប់គ្រងរបស់ប្រធានាធិបតីលោក Ferdinand Romualdez Marcos Jr។ នៅក្នុងខែកុម្ភៈ ឆ្នាំ២០២៣ សហរដ្ឋអាមេរិក និងហ្វីលីពីន បានធ្វើឱ្យមានដំណើរការឡើងវិញនូវ កិច្ចព្រមព្រៀងសហប្រតិបត្តិការការពារជាតិ (EDCA) ដែលផ្តល់ឱ្យមន្ទីរបញ្ចកោណចូល ទៅកាន់មូលដ្ឋានយោធាហ្វីលីពីន ជាយុទ្ធសាស្ត្រចំនួន៩ និងពង្រឹងវត្តមានយោធាអាមេរិកនៅក្នុងតំបន់៕

ប្រែសម្រួល ឈូក បូរ៉ា