បរទេស៖ ឥណ្ឌាបាននិយាយនៅថ្ងៃសៅរ៍ថា ខ្លួនបានហាមឃាត់ការនាំចូលទំនិញដែលមកពី ឬឆ្លងកាត់ប៉ាគីស្ថាន និងបានរារាំងកប៉ាល់ប៉ាគីស្ថាន ខណៈដែលភាពតានតឹងកើនឡើងរវាងប្រទេសជិតខាង ដែលប្រដាប់ដោយអាវុធនុយក្លេអ៊ែរទាំងពីរ បន្ទាប់ពីការវាយប្រហារដ៏សាហាវទៅលើភ្ញៀវទេសចរនៅក្នុងតំបន់ជម្លោះកាស្មៀរ។
យោងតាមសារព័ត៌មាន រ៉យទ័រ ចេញផ្សាយនៅថ្ងៃទី៣ ខែឧសភា ឆ្នាំ២០២៥ បានឱ្យដឹងថា អគ្គនាយកដ្ឋានពាណិជ្ជកម្មបរទេសរបស់ប្រទេសឥណ្ឌា បាននិយាយនៅក្នុងសេចក្តីជូនដំណឹងថាការហាមឃាត់នេះនឹងចូលជាធរមានភ្លាមៗ។
អគ្គនាយកដ្ឋាន បាននិយាយថា “ការរឹតបន្តឹងនេះត្រូវបានដាក់ក្នុងផលប្រយោជន៍សន្តិសុខជាតិ និងគោលនយោបាយសាធារណៈ”។
តំបន់ហិម៉ាឡៃយ៉ានដែលមានប្រជាជនម៉ូស្លីមភាគច្រើន ត្រូវបានទាមទារដោយប្រទេសឥណ្ឌា និងប៉ាគីស្ថាន ហើយបានក្លាយជាការផ្តោតសំខាន់នៃសង្គ្រាមជាច្រើន ការបះបោរ និងការប្រឈមមុខដាក់គ្នាផ្នែកការទូត។
ប្រទេសឥណ្ឌាបានចោទប៉ាគីស្ថានពីការជាប់ពាក់ព័ន្ធនឹងការវាយប្រហារ ដែលក្រុងអ៊ីស្លាម៉ាបាដបដិសេធ។ យ៉ាងណាក៏ដោយ ប្រទេសប៉ាគីស្ថានបាននិយាយថា ខ្លួនមាន “ការស៊ើបអង្កេតគួរឱ្យទុកចិត្ត” ដែលឥណ្ឌាមានបំណងចាប់ផ្តើមសកម្មភាពយោធា។
ប្រែសម្រួលៈ ណៃ តុលា
