បរទេស៖ ប្រធានាធិបតីអាមេរិកលោក ដូណាល់ ត្រាំ កំពុងបើកសមរភូមិថ្មីនៅក្នុងសង្គ្រាមពន្ធគយរបស់លោក ដោយផ្តោតលើខ្សែភាពយន្តដែលផលិតនៅក្រៅសហរដ្ឋអាមេរិក។
យោងតាមសារព័ត៌មាន AP ចេញផ្សាយនៅថ្ងៃទី៥ ខែឧសភា ឆ្នាំ២០២៥ បានឱ្យដឹងថា នៅក្នុងការបង្ហោះកាលពីយប់ថ្ងៃអាទិត្យនៅលើវេទិកាសង្គម Truth Social លោក ដូណាល់ ត្រាំ បាននិយាយថា លោកបានអនុញ្ញាតឱ្យក្រសួងពាណិជ្ជកម្ម និងការិយាល័យតំណាងពាណិជ្ជកម្មរបស់សហរដ្ឋអាមេរិក ដើម្បីដាក់ពន្ធ 100% “លើភាពយន្តណាមួយ និងទាំងអស់ដែលចូលមកក្នុងប្រទេសរបស់យើងដែលផលិតនៅបរទេស”។
លោកបានសរសេរថា “ឧស្សាហកម្មភាពយន្តនៅអាមេរិកកំពុងស្លាប់យ៉ាងលឿន” ដោយត្អូញត្អែរថា ប្រទេសផ្សេងទៀត “កំពុងផ្តល់ការលើកទឹកចិត្តគ្រប់បែបយ៉ាងដើម្បីទាក់ទាញ” អ្នកផលិតភាពយន្ត និងស្ទូឌីយោឱ្យឆ្ងាយពីសហរដ្ឋអាមេរិក “នេះគឺជាការខិតខំប្រឹងប្រែងរួមគ្នាដោយប្រជាជាតិដទៃទៀត ហើយដូច្នេះ វាជាការគំរាមកំហែងសន្តិសុខជាតិ។ លើសពីនេះទៅទៀតការផ្ញើសារ និងការឃោសនាផ្សេងៗ!”
គេមិនច្បាស់ភ្លាមៗថាតើពន្ធលើផលិតកម្មអន្តរជាតិ អាចត្រូវបានអនុវត្តយ៉ាងដូចម្តេចនោះទេ។ វាជារឿងធម្មតាសម្រាប់ទាំងភាពយន្តខ្នាតធំ និងតូច ដែលរួមបញ្ចូលការផលិតទាំងនៅក្នុងសហរដ្ឋអាមេរិក និងប្រទេសដទៃទៀត។ ជាឧទាហរណ៍ ភាពយន្តដែលចំណាយថវិកាច្រើន ដូចជារឿង “Mission: Impossible – The Final Reckoning” ត្រូវបានថតជុំវិញពិភពលោក៕
ប្រែសម្រួលៈ ណៃ តុលា
