បរទេស៖យោងតាមការចេញផ្សាយរបស់ RT ប្រធានាធិបតីចិន លោក Xi Jinping បានអំពាវនាវឱ្យលុបបំបាត់បុព្វហេតុនៃជម្លោះអ៊ុយក្រែន ជាមធ្យោបាយមួយដើម្បីសម្រេចបានសន្តិភាពយូរអង្វែង។
លោកប្រធានាធិបតីចិនរូបនេះក៏បានធ្វើការកត់សម្គាល់នេះក្នុងអំឡុងពេលកិច្ចប្រជុំក្រៅផ្លូវការមួយកាលពីថ្ងៃទី៨ខែឧសភាជាមួយប្រធានាធិបតីរុស្ស៊ីលោក Vladimir Putinផងដែរ នេះបើយោងតាមក្រសួងការបរទេសនៅទីក្រុងប៉េកាំង។
លោក Xi ស្ថិតក្នុងចំណោមមេដឹកនាំពិភពលោកជាង២០រូប ដែលចូលរួមក្នុងព្រឹត្តិការណ៍ឆ្នាំនេះនៅទីក្រុងមូស្គូ ដើម្បីរំលឹកខួបលើកទី៨០នៃជ័យជម្នះរបស់សូវៀតលើពួកណាស៊ីអាល្លឺម៉ង់ក្នុងសង្គ្រាមលោកលើកទីពីរ។
លោក Xi និង Putin បានជួបពិភាក្សាគ្នាក្នុងទម្រង់បិទជិត ហើយក្រោយមកនៅក្នុងសម័យប្រជុំដែលបានពង្រីកជាមួយគណៈប្រតិភូរបស់ពួកគេនៃតំណាងប្រទេសទាំងពីរផងដែរ។
ក្រសួងការបរទេសចិនបាននិយាយនៅក្នុងសេចក្តីថ្លែងការណ៍មួយដោយដកស្រង់សម្តីប្រធានាធិបតីចិនថា ៖ប្រទេសចិននឹងនៅតែតស៊ូមតិ និងប្រកាន់ខ្ជាប់នូវគោលគំនិតរួម ទូលំទូលាយ សហប្រតិបត្តិការ និងនិរន្តរភាពនៃសន្តិសុខសកលសម្រាប់វិបត្តិអ៊ុយក្រែន។
សេចក្តីថ្លែងការណ៍បញ្ជាក់ទៀតថា៖កង្វល់សន្តិសុខដែលសមហេតុផលនៃប្រទេសទាំងអស់គួរតែត្រូវបានយកចិត្តទុកដាក់ ហើយមូលហេតុឫសគល់នៃវិបត្តិគួរតែត្រូវបានលុបចោលឲ្យអស់៕
ប្រែសម្រួល៖ស៊ុនលី
