បរទេស៖ រដ្ឋមន្ត្រីក្រសួង ការពារជាតិថៃ លោក Phumtham Wechayachai បានច្រានចោលការព្រួយ បារម្មណ៍អំពីការធ្វើរដ្ឋប្រហារ ដែលអាចកើតមាន ក្រោមការរិះគន់ជាសាធារណៈ កាន់តែខ្លាំងឡើង ចំពោះការដោះស្រាយ របស់រដ្ឋាភិបាល ចំពោះភាពតានតឹង ព្រំដែនកម្ពុជា-ថៃ។
យោងតាមសារព័ត៌មាន បាងកក ប៉ុស្តិ៍ ចេញផ្សាយនៅថ្ងៃទី៧ ខែមិថុនា ឆ្នាំ២០២៥ បានឱ្យដឹងថា ប្រតិកម្មទៅនឹងការ ពិភាក្សាអំពីការធ្វើ រដ្ឋប្រហារ និងការទម្លាក់រដ្ឋាភិបាល ដោយក្រុមជាតិនិយមមួយចំនួន, លោក Phumtham Wechayachai បាននិយាយ កាលពីថ្ងៃសុក្រថា លោក និង យោធារក្សាការទំនាក់ទំនង ហើយមិនមានសញ្ញាណាមួយ នៃការអន្តរាគមន៍ខាងយោធានោះទេ។
លោកបានបន្តថា «សម្រាប់អ្នកដែលញុះញង់មនោសញ្ចេតនាជាតិនិយម ពួកគេគួរតែយល់ថាសង្គ្រាមគឺត្រូវចៀសវាងល្អបំផុត។ កុំញុះញង់ កុំឲ្យមានបញ្ហាកើតឡើង។
លោកក៏បានជំរុញឱ្យសាធារណជន គិតវិជ្ជមាន និងបែងចែករវាងការ ការពារអធិបតេយ្យភាពជាតិ និងការរក្សាទំនាក់ ទំនងការទូត ។ លោកបានបន្ថែមថា ពិភពលោកមានបញ្ហាជាច្រើន ហើយទំនាក់ទំនងអន្តរជាតិ គឺជាផ្នែកនៃយន្តការដោះស្រាយជម្លោះ។
នៅពេលសួរថាតើជំហររឹងមាំ របស់កងទ័ពអាចកើនឡើង និងបង្កឲ្យមានរដ្ឋប្រហារ ឬយ៉ាងណានោះ រដ្ឋមន្ត្រីការពារជាតិរូបនេះ បាននិយាយថា កងទ័ពមានកាតព្វកិច្ចបំពេញ និងមិនមានជម្លោះជាមួយរដ្ឋាភិបាល ដោយបន្ថែមកាតព្វកិច្ចរបស់ខ្លួនរួមមានការត្រៀមខ្លួន ដើម្បីការពារអធិបតេយ្យភាពជាតិ៕
