ប្រធានាធិបតីរុស្ស៊ីថា អ៊ីរ៉ង់មានសិទ្ធិប្រើប្រាស់បច្ចេកវិទ្យានុយក្លេអ៊ែរ សម្រាប់គោលបំណងសន្តិភាព

បរទេស៖ ប្រធានាធិបតីរុស្ស៊ី លោក វ្ល៉ាឌីមៀ ពូទីន បាននិយាយនៅក្នុងបទសម្ភាសន៍មួយថា អ៊ីរ៉ង់មានសិទ្ធិប្រើប្រាស់បច្ចេកវិទ្យានុយក្លេអ៊ែរសម្រាប់គោលបំណងសន្តិភាព។ បន្ទាប់ពីសម័យប្រជុំពេញអង្គ នៃវេទិកាសេដ្ឋកិច្ចអន្តរជាតិ St. Petersburg (SPIEF) កាលពីថ្ងៃសុក្រ លោកបាននិយាយជាមួយ Nadim Koteich ដែលជាអ្នកសម្របសម្រួលនៃសម័យប្រជុំ និងជាអ្នកគ្រប់គ្រងទូទៅនៃ Sky News Arabia ។

យោងតាមសារព័ត៌មាន RT ចេញផ្សាយនៅថ្ងៃទី២១ ខែមិថុនា ឆ្នាំ២០២៥ បានឱ្យដឹងថា ប្រធានាធិបតីរុស្ស៊ីបាននិយាយថា “យើងជឿថាអ៊ីរ៉ង់មានសិទ្ធិប្រើប្រាស់ថាមពលនុយក្លេអ៊ែរសម្រាប់គោលបំណងសន្តិវិធី ហើយយើងត្រូវបានរៀបចំដូចដែលយើងធ្លាប់មានកាលពីឆ្នាំមុន ដើម្បីផ្តល់ការគាំទ្រជាចាំបាច់ក្នុងវិស័យនេះ” ។

លោកពូទីនបានបន្ថែមថា រុស្ស៊ីប្រឆាំងការរីករាលដាលអាវុធនុយក្លេអ៊ែរនៅក្នុងប្រទេសណាមួយ។ ទីភ្នាក់ងារថាមពលអាតូមិកអន្តរជាតិ [IAEA] ក៏បានបញ្ជាក់ថា មិនមានភស្តុតាងនៃកិច្ចខិតខំប្រឹងប្រែងរបស់អ៊ីរ៉ង់ ដើម្បីទទួលបានអាវុធនុយក្លេអ៊ែរនោះទេ។

សូមជម្រាបថា កាលពីសប្តាហ៍មុន អ៊ីស្រាអែលបានចាប់ផ្តើមការវាយប្រហារជាបន្តបន្ទាប់ប្រឆាំងនឹងអ៊ីរ៉ង់ និងបានចេញការព្រមានយ៉ាងធ្ងន់ធ្ងរទាក់ទងនឹងកម្មវិធីនុយក្លេអ៊ែររបស់ប្រទេស។ ខ្លួនបានអះអាងថា ទីក្រុងតេអេរ៉ង់កំពុងជិតដល់ចំណុចសំខាន់មួយយ៉ាងឆាប់រហ័សក្នុងការស្វែងរកអាវុធនុយក្លេអ៊ែររបស់ខ្លួន ដោយនិយាយថា ការវាយប្រហារមានសារៈសំខាន់ក្នុងការទប់ស្កាត់បញ្ហានេះ៕

ប្រែប្រួលៈ ណៃ តុលា