បរទេស៖ ទីក្រុងតេអេរ៉ង់បានចោទទីក្រុងវ៉ាស៊ីនតោនពីបទរំលោភច្បាប់អន្តរជាតិ និងសន្ធិសញ្ញាមិនរីកសាយភាយអាវុធនុយក្លេអ៊ែរ បន្ទាប់ពីយោធាអាមេរិកបានចូលរួមជាមួយកងកម្លាំងអ៊ីស្រាអែល ក្នុងយុទ្ធនាការវាយប្រហារតាមអាកាសរយៈពេលមួយសប្តាហ៍របស់ពួកគេប្រឆាំងនឹងទីតាំងនុយក្លេអ៊ែរ និងទីតាំងយោធារបស់អ៊ីរ៉ង់។
យោងតាមសារព័ត៌មាន RT ចេញផ្សាយនៅថ្ងៃទី២២ ខែមិថុនា ឆ្នាំ២០២៥ បានឱ្យដឹងថា លោកប្រធានាធិបតី Trump បានប្រកាសពីការវាយប្រហារលើកដំបូងរបស់សហរដ្ឋអាមេរិកនៅក្នុងការបង្ហោះនៅលើ Truth Social កាលពីយប់ថ្ងៃសៅរ៍ ម៉ោងក្នុងស្រុកក្នុងទីក្រុងវ៉ាស៊ីនតោន។ លោក Trump បានសរសេរថា “គ្រាប់បែកបន្ទុកពេញលេញនៃ BOMBS ត្រូវបានទម្លាក់នៅលើទីតាំងធំ Fordow” ដោយបន្ថែមថាគោលដៅផ្សេងទៀតរួមមាន Natanz និង Esfahan ។
នៅក្នុងការបង្ហោះដដែល និងសារបន្តបន្ទាប់ជាច្រើន មេដឹកនាំអាមេរិកបានជំរុញឱ្យទីក្រុងតេអេរ៉ង់កុំសងសឹក និងចូលរួមក្នុងកិច្ចចរចា ដោយអះអាងថា ឥឡូវនេះវាដល់ពេលសម្រាប់សន្តិភាពហើយ។
ចំណែករដ្ឋមន្ត្រីការបរទេសអ៊ីរ៉ង់លោក Seyed Abbas Araghchi បានថ្កោលទោសការវាយប្រហារតាមអាកាសរបស់សហរដ្ឋអាមេរិកថាជាការរំលោភលើសន្ធិសញ្ញាអន្តរជាតិទាំងអស់ ដោយបញ្ជាក់ថា “អ៊ីរ៉ង់ត្រៀមជម្រើសទាំងអស់ដើម្បីការពារអធិបតេយ្យភាព ផលប្រយោជន៍ និងប្រជាជនរបស់ខ្លួន”។
កន្លងមក ទីក្រុងតេអេរ៉ង់បានព្រមានក្រុងវ៉ាស៊ីនតោន និងភាគីទីបីផ្សេងទៀត ប្រឆាំងនឹងការចូលរួមក្នុងជម្លោះនេះ ដោយគំរាមកំណត់គោលដៅលើទ្រព្យសម្បត្តិអរិភាព និងការដឹកជញ្ជូនអាវុធដែលចងសម្រាប់អ៊ីស្រាអែល។ អ្នកនាំពាក្យក្រុម Houthis របស់យេម៉ែនក៏បានព្រមានដែរថា ប្រសិនបើអាមេរិកចូលរួម ក្រុមនេះនឹងកំណត់គោលដៅលើនាវាចម្បាំងរបស់ខ្លួននៅសមុទ្រក្រហម៕
ប្រែសម្រួលៈ ណៃ តុលា
