ថៃ រឹបអូសគ្រឿងញៀនទម្ងន់ ២,៦តោន នៅខេត្តរ៉ាក់យ៉ង ដែលគ្រោងនឹងដឹកជញ្ជូនចេញក្រៅប្រទេស

បរទេស៖ អាជ្ញាធរថៃបានរឹបអូសថ្នាំញៀនប្រភេទគ្រីស្តាល់ជាង ២តោន ដែលបន្លំធ្វើជាម្សៅពោត ពីទូកទេសចរណ៍មួយនៅភាគខាងកើតប្រទេសថៃ ដោយរារាំងការដឹកជញ្ជូនតម្លៃ ៩០លានដុល្លារអាមេរិក ពីការរត់ពន្ធចេញពីប្រទេស។

យោងតាមសារព័ត៌មាន VN Express ចេញផ្សាយនៅថ្ងៃទី២៥ ខែមិថុនា ឆ្នាំ២០២៥ បានឱ្យដឹងថា មន្ត្រីបាននិយាយកាលពីថ្ងៃចន្ទថា បុរសប្រាំបីនាក់ត្រូវបានចាប់ខ្លួន កាលពីថ្ងៃសៅរ៍នៅក្នុងខេត្ត Rayong ពីបទប៉ុនប៉ងរត់ពន្ធគ្រឿងញៀនជិត ២,៦ តោន ឆ្លងកាត់ព្រំដែនភាគខាងត្បូង។ ពួកគេមិនបានបញ្ជាក់លម្អិតពីគោលដៅដែលបានគ្រោងទុក ឬប្រភពដើមនៃថ្នាំញៀនទាំងនោះ នោះទេ។

នាយកដ្ឋានស៊ើបអង្កេតពិសេសរបស់ប្រទេសថៃបាននិយាយថា ប្រសិនបើលក់ទៅក្រៅប្រទេស ថ្នាំញៀនទាំងនោះត្រូវបានគេប៉ាន់ប្រមាណថា មានតម្លៃជាង ៣ ពាន់លានបាត ស្មើនឹង ៩០,៨ លានដុល្លារ។

ថ្នាំញៀនត្រូវបានគេវេចខ្ចប់ក្នុងថង់ប្លាស្ទិក ដោយបន្លំជាកញ្ចប់ម្សៅពោត ។ កញ្ចប់នីមួយៗមានទម្ងន់ប្រហែលមួយគីឡូក្រាម។ អាជ្ញាធរបាននិយាយថា ពួកគេក៏បានរឹបអូសរថយន្តមួយគ្រឿង និងរថយន្តដែលគេជឿថា មានជាប់ពាក់ព័ន្ធនឹងការរត់ពន្ធគ្រឿងញៀន។

នាយករដ្ឋមន្ត្រីថៃ លោកស្រី Paetongtarn Shinawatra បានថ្លែងអំណរគុណដល់មន្ត្រី ចំពោះការខិតខំប្រឹងប្រែងរបស់ពួកគេ ហើយបានប្រាប់សន្និសីទសារព័ត៌មានថា “រដ្ឋាភិបាលពិតជាយកចិត្តទុកដាក់ ចំពោះគោលនយោបាយរបស់យើងលើគ្រឿងញៀន”។

អ្នកជំនាញរបស់អង្គការសហប្រជាជាតិបាននិយាយថា ប្រទេសជិតខាងមីយ៉ាន់ម៉ា គឺជាប្រភពនៃថ្នាំញៀនមេតំហ្វេតាមីន និងហេរ៉ូអ៊ីនភាគច្រើនក្នុងតំបន់។

“ត្រីកោណមាស” ជាកន្លែងដែលព្រំប្រទល់នៃប្រទេសមីយ៉ាន់ម៉ា ឡាវ និងថៃជួបគ្នា មានភាពល្បីល្បាញខាងការផលិតអាភៀន និងហេរ៉ូអ៊ីន ដែលរីកដុះដាលយ៉ាងខ្លាំងដោយសារតែទីតាំងដាច់ស្រយាល និងការអនុវត្តច្បាប់មិនតឹងរ៉ឹង។ ក្នុងប៉ុន្មានទសវត្សរ៍ថ្មីៗនេះ ថ្នាំញៀនប្រភេទមេតំហ្វេតាមីនបានជំនួសអាភៀន និងហេរ៉ូអ៊ីន ព្រោះវាងាយស្រួលផលិតនៅលើខ្នាតឧស្សាហកម្ម៕

ប្រែសម្រួលៈ ណៃ តុលា