ភ្នំពេញ ៖ ក្រុមប្រឹក្សាធម្មនុញ្ញកម្ពុជា បានបោះឆ្នោតជាឯកច្ឆន្ទជ្រើសតាំង លោក ហ៊ី សោភា ជាប្រធានក្រុមប្រឹក្សា ធម្មនុញ្ញ សម្រាប់អាណត្តិ៣ឆ្នាំ ចាប់ពីឆ្នាំ២០២៥-២០២៨ ជាលើកទី១០។
យោងតាមសេចក្តីប្រកាសព័ត៌មាន របស់អគ្គលេខាធិការ នៃក្រុមប្រឹក្សាធម្មនុញ្ញ បានឲ្យដឹងថា ការបោះឆ្នោត ជាឯកច្ឆន្ទជ្រើសតាំង លោក ហ៊ី សោភា ជាប្រធានក្រុមប្រឹក្សាធម្មនុញ្ញលើកទី១០នេះ ធ្វើឡើងក្នុងកិច្ចប្រជុំ ពេញអង្គនាព្រឹកថ្ងៃ២៦ មិថុនា ។
ជាលទ្ធផលនៃការបោះឆ្នោតរួចលោកបណ្ឌិត អ៊ឹម ឈុនលឹម ជាប្រធានក្រុមប្រឹក្សាធម្មនុញ្ញអាណត្តិចាស់ បានប្រគល់ ត្រាក្រុមប្រឹក្សាធម្មនុញ្ញ និងញញូរ “ព្រហ្មវិនិច្ឆ័យ” ជូនលោក ហ៊ី សោភា ក្នុងកិច្ចផ្ទេរតំណែង ប្រធានក្រុមប្រឹក្សាធម្មនុញ្ញថ្មី។
ក្នុងនោះក៏បានប្រកាសសមាជិកថ្មី ចូលកាន់តំណែង ចំនួន៣រូបផងដែរ រួមមាន ៖ លោក យក់ ង៉ុយ (ជ្រើសតាំងសាជាថ្មី ដោយរដ្ឋសភា) លោកស្រី ខែក កែមាលី ស៊ីសូដា (តែងតាំងដោយព្រះមហាក្សត្រ) និងលោក យូ ប៊ុនឡេង (តែងតាំង ដោយឧត្តមក្រុមប្រឹក្សា នៃអង្គចៅក្រម) ជំនួសសមាជិក ៣រូប ដែលត្រូវចប់អាណត្តិ រួមមាន ៖ លោកបណ្ឌិត អ៊ឹម ឈុនលឹម , សម្តេច ស៊ីសុវត្ថិ ពង្សនារី មុនីពង្ស និងលោក យក់ ង៉ុយ៕
សូមបញ្ជាក់ថា លោក ហ៊ី សោភា ត្រូវបានឧត្តមក្រុមប្រឹក្សា នៃអង្គចៅក្រម តែងតាំងជាសមាជិក ក្រុមប្រឹក្សាធម្មនុញ្ញ តាំងពីឆ្នាំ២០១៧ ៕
