តេអេរ៉ង់៖ ទីភ្នាក់ងារព័ត៌មានផ្លូវការ របស់អ៊ីរ៉ង់ IRNA បានរាយការណ៍ថា ចំនួនអ្នកស្លាប់ដោយសារការ វាយប្រហាររបស់អ៊ីស្រាអែល លើប្រទេសអ៊ីរ៉ង់ ចន្លោះពីថ្ងៃទី១៣ ដល់ថ្ងៃទី២៤ ខែមិថុនា បានកើនឡើងដល់ ៩៣៥ នាក់ ក្នុងនោះមានកុមារ ៣៨ នាក់ និងស្ត្រី ១៣២ នាក់ ។
ដោយលើកឡើងពីតួលេខពីអង្គការវេជ្ជសាស្ត្រច្បាប់អ៊ីរ៉ង់ អ្នកនាំពាក្យតុលាការលោក Asghar Jahangir បានឲ្យដឹងនៅក្នុងសន្និសីទកាសែតក្នុងទីក្រុងតេអេរ៉ង់ថាស្ត្រីខ្លះ ដែលត្រូវបានគេសម្លាប់ កំពុងមានផ្ទៃពោះ។
យោងតាមអាជ្ញាធរអ៊ីរ៉ង់ បានឱ្យដឹងថា អ៊ីស្រាអែលបានបើកការវាយប្រហារ តាមអាកាសធំជា បន្តបន្ទាប់កាលពីថ្ងៃទី១៣ ខែមិថុនា សំដៅលើទីតាំងនុយក្លេអ៊ែរ និងយោធានៅទូទាំងប្រទេសអ៊ីរ៉ង់ ដោយបាន សម្លាប់មេបញ្ជាការជាន់ខ្ពស់ អ្នកវិទ្យាសាស្ត្រនុយក្លេអ៊ែរ និងជនស៊ីវិល និងជាច្រើននាក់ទៀតរងរបួស នេះបើយោងតាមអាជ្ញាធរអ៊ីរ៉ង់។
អ៊ីរ៉ង់បានសងសឹកដោយរលកជាច្រើន នៃការវាយប្រហារដោយមីស៊ីល និងយន្តហោះគ្មានមនុស្សបើកលើទឹកដីអ៊ីស្រាអែលដែលបណ្តាលឲ្យមានមនុស្សស្លាប់ និងខូចខាតមួយចំនួនវិញោងដែរ។
ក្រោយមក បទឈប់បាញ់គ្នារវាងប្រទេសទាំងពីរ ត្រូវបានសម្រេចនៅថ្ងៃទី២៤ ខែមិថុនា ដោយបញ្ចប់ការប្រយុទ្ធគ្នារយៈពេល ១២ថ្ងៃ៕
ប្រែសម្រួល ឈូក បូរ៉ា
