បរទេស៖ គ្រូបង្រៀនម្នាក់ នៅក្នុងខេត្ត Nong Bua Lam Phu ប្រទេសថៃ ត្រូវបានព្យួរអាជ្ញាប័ណ្ណបង្រៀន បន្ទាប់ពីត្រូវបានចាប់ខ្លួន ពីបទប្រើប្រាស់ថ្នាំមេតំហ្វេតាមីន និងកាន់កាប់អាវុធដែលមិនបានចុះបញ្ជី។
យោងតាមសារព័ត៌មាន បាងកក ប៉ុស្តិ៍ ចេញផ្សាយនៅថ្ងៃទី៤ ខែកក្កដា ឆ្នាំ២០២៥ បានឱ្យដឹងថា ក្រុមប្រឹក្សាគ្រូបង្រៀន ប្រទេសថៃបានផ្តួចផ្តើមនីតិវិធីដាក់វិន័យ យ៉ាងធ្ងន់ធ្ងរបំផុត បន្ទាប់ពីមានការលាតត្រដាងថា គ្រូបង្រៀនបានប្រើថ្នាំញៀនប្រភេទ មេតំហ្វេតាមីនអស់រយៈពេលជាង ២០ ឆ្នាំមកហើយ។
ការចាប់ខ្លួននេះបានធ្វើឡើងកាលពីថ្ងៃអង្គារ នៅពេលដែលប៉ូលីសបានឆ្មក់ចូលផ្ទះរបស់គ្រូបង្រៀននៅក្នុងឃុំ Kudhae នៃស្រុក Na Klang ។ សមត្ថកិច្ចបានរកឃើញថ្នាំញៀនប្រភេទមេតំហ្វេតាមីន១២គ្រាប់ និងអាវុធខុសច្បាប់២ដើម ។ ការឆ្មក់ចូលនោះបានធ្វើឡើងបន្ទាប់ពីមានការត្អូញត្អែរម្តងហើយម្តងទៀតពីអ្នកស្រុកដែលចោទថា គ្រូបង្រៀនរូបនោះនោះជាអ្នកប្រើប្រាស់គ្រឿងញៀនយូរមកហើយ។ ជនសង្ស័យអាយុ៤៤ឆ្នាំជាគ្រូបង្រៀនអប់រំកាយនិងសិល្បៈសម្រាប់សិស្សថ្នាក់ទី៦ត្រូវបានសមត្ថកិច្ចឃាត់ខ្លួន។
ប៉ូលីសបាននិយាយថា ក្រោយមកគាត់បានសារភាពថាបានប្រើប្រាស់ថ្នាំ មេតំហ្វេតាមីន ដល់ទៅ ៣ គ្រាប់ក្នុងមួយថ្ងៃក្នុងរយៈពេល ២ ទសវត្សរ៍ ឬជាង ២០ឆ្នាំ កន្លងមកនេះ ហើយបានសារភាពថាគាត់មិនអាចបញ្ឈប់បានទេ។
លោក Amolwan Weerathammo អគ្គលេខាធិការក្រុមប្រឹក្សាគ្រូបង្រៀន នៃប្រទេសថៃកាលពីម្សិលមិញបានអះអាងថា គ្រូបង្រៀនមានអាជ្ញាប័ណ្ណត្រឹមត្រូវ ដែលនឹងផុតកំណត់នៅក្នុងខែកញ្ញាឆ្នាំក្រោយ៕
ប្រែសម្រួលៈ ណៃ តុលា
