បរទេស៖ នៅក្នុងការបង្រ្កាបដ៏ ល្បីមួយនៅខេត្ត Roi Et ដែលគ្រប់គ្រងដោយក្រសួងមហាផ្ទៃ , បុរសម្នាក់គឺត្រូវបានចាប់ខ្លួន ពីបទគ្រប់គ្រងក្រុមលើកម្មវិធី App ដ៏ពេញនិយមមួយ ដែលផ្សាយផ្ទាល់ពីក្មេងស្រី មិនទាន់គ្រប់អាយុក្នុងភាព អាក្រាតកាយដើម្បីរកប្រាក់ចំណេញ ។
យោងតាមសារព័ត៌មាន បាងកក ប៉ុស្តិ៍ ចេញផ្សាយនៅថ្ងៃទី១១ ខែកក្កដា ឆ្នាំ២០២៥ បានឱ្យដឹងថា ក្មេងជំទង់ពីរនាក់ដែលរងគ្រោះដោយការជួញដូរមនុស្សត្រូវ បានជួយសង្គ្រោះក្នុងប្រតិបត្តិការនោះ។
នាយករដ្ឋមន្រ្តីស្តីទីរបស់ថៃ លោក Phumtham Wechayachai ដែលជារដ្ឋមន្ត្រីក្រសួងមហាផ្ទៃផងដែរនោះ បានបញ្ជាឱ្យរដ្ឋលេខាធិការអចិន្ត្រៃយ៍មហាផ្ទៃ Unsit Sampantarat បញ្ជាឱ្យមន្ទីររដ្ឋបាលខេត្ត (Dopa) ចាប់ផ្តើមប្រតិបត្តិការបង្ក្រាប។
ក្នុងប្រតិបត្តិការនោះ ក្មេងស្រីរងគ្រោះពីរនាក់អាយុ១៦ឆ្នាំ និង១៧ឆ្នាំ ត្រូវបានជួយសង្គ្រោះ ។ ពួកគេនឹងទទួលបានការស្តារនីតិសម្បទា និងការថែទាំផ្លូវចិត្តនៅកន្លែងស្នាក់នៅរបស់កុមារ។ ជនរងគ្រោះទី៣ ដែលជាក្មេងស្រីអាយុ ១៤ ឆ្នាំ ត្រូវបានគេរកឃើញផងដែរក្នុងអំឡុងពេលចាប់ខ្លួនអ្នកគ្រប់គ្រងក្រុម។
ការស៊ើបអង្កេតនេះត្រូវបានចាប់ផ្តើមបន្ទាប់ពី មន្ទីររដ្ឋបាលខេត្ត បានទទួលរបាយការណ៍ពីមូលនិធិ The Exodus Road និងកម្មវិធី Scientia ថា ក្មេងស្រីមិនទាន់គ្រប់អាយុត្រូវបានកេងប្រវ័ញ្ចតាមរយៈការផ្សាយផ្ទាល់នៅលើកម្មវិធី Discord នៅក្នុងអ្វីដែលបង្កើតបានជាប្រតិបត្តិការជួញដូរមនុស្ស ពាក់ព័ន្ធនឹងការផលិត និងការចែកចាយរូបភាពអាសអាភាសកុមារ។
អាជ្ញាធរបានរឹបអូសវត្ថុតាងសំខាន់ៗមួយចំនួនរួមមានកុំព្យូទ័រ ទូរស័ព្ទដៃ សៀវភៅកំណត់ត្រាផ្ទេរប្រាក់ និងភស្តុតាងឌីជីថលផ្សេងទៀតដែលបង្ហាញ ពីការកេងប្រវ័ញ្ចផ្លូវភេទ ជាប្រព័ន្ធលើអនីតិជនតាមរយៈកម្មវិធី៕
ប្រែសម្រួលៈ ណៃ តុលា
