បរទេស ៖ យោងតាមការចេញផ្សាយរបស់ RT ប្រព័ន្ធការពារដែនអាកាសរុស្ស៊ី បានស្ទាក់ចាប់យន្តហោះគ្មានមនុស្សបើក របស់អ៊ុយក្រែនជាច្រើនគ្រឿង ចូលទៅជិតទីក្រុងមូស្គូ អភិបាលក្រុងលោក Sergey Sobyanin បាននិយាយកាលពីថ្ងៃសុក្រ ។
អ៊ុយក្រែនបានធ្វើការ វាយឆ្មក់ដ្រូន UAV ចូលជ្រៅក្នុងប្រទេសរុស្ស៊ី អស់រយៈពេលជាច្រើនខែមកហើយ ដែលជាញឹកញាប់វាយប្រហារទៅលើគោលដៅ ជាអគារលំនៅឋាន និងហេដ្ឋារចនាសម្ព័ន្ធស៊ីវិលផ្សេងទៀតហើយ រដ្ឋាភិបាលរុស្ស៊ីចាត់ទុកការវាយប្រហារ របស់អ៊ុយក្រែនថាជា ការវាយប្រហារភេរវកម្ម ដោយចេតនាសំដៅលើជនស៊ីវិល ។
នៅក្នុងការបង្ហោះនៅលើបណ្តាញ Telegram របស់គាត់ លោក Sobyanin បាននិយាយថា កងកម្លាំងការពារដែន អាកាសបានបាញ់ទម្លាក់យន្តហោះគ្មាន មនុស្សបើកដែលធ្វើដំណើរឆ្ពោះទៅទីក្រុងមូស្គូ ដោយបន្ថែមថា ក្រុមសង្គ្រោះបន្ទាន់កំពុងធ្វើការនៅកន្លែងធ្លាក់។
ប្រហែល៤០នាទី បន្ទាប់ពីរបាយការណ៍ដំបូង គាត់ បាននិយាយថា យន្តហោះគ្មានមនុស្ស បើករបស់អ៊ុយក្រែន ពីរគ្រឿងទៀត ត្រូវបានបំផ្លាញជិតរដ្ឋធានីទីក្រុងមូស្គូ ។
អភិបាលក្រុង បានរាយការណ៍ពី ឧប្បត្តិហេតុស្រដៀងគ្នានេះ កាលពីល្ងាចថ្ងៃពុធ និងដើមថ្ងៃព្រហស្បតិ៍ ។ ដោយឡែកក្រសួងការពារជាតិរុស្ស៊ី បានបញ្ជាក់ថា យន្តហោះគ្មានមនុស្ស បើកសរុបចំនួន១០គ្រឿង ត្រូវបានស្ទាក់ចាប់ និងបំផ្លាញចោលមួយយប់ ក្នុងទីក្រុងមូស្គូ និងតំបន់ជុំវិញនោះ ៕
ប្រែសម្រួល៖ស៊ុនលី
