សាន់ហ្វ្រាន់ស៊ីស្កូ៖ នាយកដ្ឋានរតនាគារសហរដ្ឋអាមេរិក នៃការគ្រប់គ្រងទ្រព្យសម្បត្តិបរទេស (OFAC) បានប្រកាសការដាក់ទណ្ឌកម្មដ៏ធំប្រឆាំងនឹងបុគ្គល អង្គភាព និងនាវាមួយចំនួនដែលត្រូវបានចោទប្រកាន់ថា មានទំនាក់ទំនងជាមួយបណ្តាញ ដឹកជញ្ជូនប្រេងរបស់អ៊ីរ៉ង់។
នាយកដ្ឋានរតនាគារ បាននិយាយនៅក្នុងសេចក្តីប្រកាសព័ត៌មានមួយថា កញ្ចប់នេះកំពុងកំណត់ “បុគ្គល និងអង្គភាពជាង ៥០ និងកំណត់អត្តសញ្ញាណ នាវាជាង ៥០” ។
សេចក្តីប្រកាសព័ត៌មាន បានកត់សម្គាល់ថា “បណ្តាញនេះដឹកជញ្ជូនប្រេង និងផលិតផលប្រេងពីប្រទេសអ៊ីរ៉ង់ និងរុស្ស៊ី ក៏ដូចជាទំនិញផ្សេងទៀត ទៅកាន់អ្នកទិញនៅជុំវិញពិភពលោក” ។
រដ្ឋមន្ត្រីក្រសួងរតនាគារអាមេរិកលោក Scott Bessent បានឲ្យដឹងថា វាគឺជាកញ្ចប់ទណ្ឌកម្មដ៏ធំបំផុតដែលទាក់ទងនឹងប្រទេសអ៊ីរ៉ង់ ចាប់តាំងពីឆ្នាំ២០១៨ មក។ “ទណ្ឌកម្មជាង ១១៥ ដែលបានចេញផ្សាយ នៅថ្ងៃនេះ គឺជាកញ្ចប់ដ៏ធំបំផុតចាប់តាំងពីរដ្ឋបាលលោក ត្រាំ អនុវត្តយុទ្ធនាការ នៃសម្ពាធអតិបរមារបស់យើង លើប្រទេសអ៊ីរ៉ង់” ។
សកម្មភាពនេះត្រូវបានធ្វើឡើង ដោយអនុលោមតាមបញ្ជាប្រតិបត្តិលេខ ១៣៩០២ ដែលកំណត់គោលដៅលើអ្នកដែលប្រតិបត្តិការក្នុងវិស័យមួយចំនួននៃសេដ្ឋកិច្ចអ៊ីរ៉ង់។ សេចក្តីប្រកាសព័ត៌មានបានឲ្យដឹងថា វាក៏ស្ថិតនៅក្នុងការអនុវត្តបន្ថែមទៀត របស់រតនាគារនៃអនុស្សរណៈប្រធានាធិបតីសន្តិសុខជាតិ ២ ដោយបង្កើតយុទ្ធនាការនៃសម្ពាធសេដ្ឋកិច្ចអតិបរមាលើប្រទេសអ៊ីរ៉ង់៕
ប្រែសម្រួល ឈូក បូរ៉ា
