បរទេស៖ យោងតាមការចេញផ្សាយរបស់ RT ទីប្រឹក្សាជាន់ខ្ពស់ផ្នែកកិច្ចការងារសន្តិសុខជាតិឥណ្ឌា លោក Ajit Doval គ្រោងនឹងធ្វើទស្សនកិច្ចនៅប្រទេសរុស្ស៊ីក្នុងសប្តាហ៍នេះ ដើម្បីពិភាក្សាអំពីបញ្ហាការពារជាតិ និងសន្តិសុខ ។
លោកDoval ត្រូវបានគេរំពឹងថានឹងជួបពិភាក្សាជាមួយមន្ត្រីជាន់ខ្ពស់រុស្ស៊ី ហើយទំនងជានឹងពិភាក្សាអំពីការទិញប្រព័ន្ធមីស៊ីលការពារដែនអាកាស S-400 បន្ថែមទៀត នេះបើយោងតាមរបាយការណ៍ដដែល។
បច្ចុប្បន្ន ប្រទេសឥណ្ឌាមានប្រព័ន្ធ S-400 ចំនួន៣គ្រឿងមកហើយដែលជាផ្នែកមួយនៃការបញ្ជាទិញធំជាងចំនួន៥ដែលទិញពីប្រទេសរុស្ស៊ី។ ប្រព័ន្ធនេះត្រូវបានគេដាក់ឱ្យប្រើក្នុងអំឡុងពេលការប្រឈមមុខដាក់គ្នាផ្នែកយោធារបស់ប្រទេសប៉ាគីស្ថានក្នុងខែឧសភា។
ដំណើរទស្សនកិច្ចរបស់លោក Doval ទោះបីជាមានការគ្រោងទុកមុនក៏ដោយ បានទទួលនូវសារៈសំខាន់កាន់តែខ្លាំងបន្ទាប់ពីការរិះគន់របស់ប្រធានាធិបតីអាមេរិក Donald Trump ចំពោះការនាំចូលប្រេងរបស់ប្រទេសឥណ្ឌាពីប្រទេសរុស្ស៊ី។
ប្រភពដដែលក៏បានប្រាប់ RT ដែរថារដ្ឋមន្ត្រីការបរទេសឥណ្ឌាលោក S. Jaishankar ក៏ត្រូវបានគេរំពឹងថានឹងធ្វើដំណើរទៅកាន់ប្រទេសរុស្ស៊ីនៅចុងខែនេះ៕
ប្រែសម្រួល៖ ស៊ុនលី
