ប្រទេសឡាវ កំពុងបង្កើនជំនាញកសិករទុរេន ដើម្បីទទួលបានទីផ្សារពិភពលោក
វៀងចន្ទន៍៖ ឡាវកំពុងធ្វើការដើម្បីលើកកម្ពស់ជំនាញ កសិករក្នុងស្រុកក្នុងការដាំដុះទុរេន និងការយល់ដឹងរបស់ពួកគេអំពីគោលការណ៍ណែនាំរៀបចំការនាំចេញ ដើម្បីធានាថាទុរេនឡាវ មានគុណភាព និងស្តង់ដារបទប្បញ្ញត្តិអន្តរជាតិ។
យោងតាមរបាយការណ៍ពីក្រសួង កសិកម្ម និងរុក្ខាប្រមាញ់ឡាវ សមាគមធុរកិច្ចកសិកម្មឡាវ សហការជាមួយដៃគូបានរៀប ចំសិក្ខាសាលាបច្ចេកទេសមួយ ដើម្បីផ្តល់ឱ្យអ្នកដាំទុរេនឡាវ នូវចំណេះដឹងជាក់ស្តែងលើបច្ចេកទេសដាំដុះ ការថែទាំដើមឈើត្រឹមត្រូវ និងបទប្បញ្ញត្តិនាំចេញ។
សិក្ខាសាលាដែលបានធ្វើឡើង នៅទីក្រុងវៀងចន្ទន៍ ប្រទេសឡាវកាលពីថ្ងៃសុក្រ សប្តាហ៍មុនក្នុងគោលបំណង បង្រួបបង្រួមអ្នកដាំទុរេន និង សហគ្រិនដែលមានចំណាប់អារម្មណ៍ទូទាំងប្រទេស ជំរុញកិច្ចសហប្រតិបត្តិការ ក្នុងចំណោមពួកគេ។ វាក៏បានស្វែងរកការពង្រឹងជំនាញ និងចំណេះដឹងបច្ចេកទេសរបស់អ្នកចូលរួមក្នុងការដាំដុះទុរេន ចាប់ពីការដាំដំបូងរហូតដល់ការប្រមូលផល ដើម្បីបង្កើនទិន្នផល និងគុណភាពផ្លែ។
បច្ចុប្បន្នទុរេនត្រូវបានគេដាំដុះលើផ្ទៃដីចំនួន ២៦៩ ហិកតានៅទូទាំងប្រទេស ដោយមានដើមធុរេនចំនួន ១៨ ៩៥៧ ដើម។ យោងតាមរបាយការណ៍បានឱ្យដឹងថានៅឆ្នាំ២០២៦ ផលិតកម្មត្រូវបានគេរំពឹងថា នឹងឈានដល់ប្រហែល ៤០០តោននៃទុរេនគុណភាពខ្ពស់ដែលត្រៀមផ្គត់ផ្គង់ទាំងទីផ្សារក្នុងស្រុក និងអន្តរជាតិ។
ថ្លែងក្នុងកិច្ចប្រជុំនេះ លោក Bounchan Kombounyasith អគ្គនាយក នៃនាយកដ្ឋានកសិកម្ម ក្រោមក្រសួងកសិកម្ម និងរុក្ខាប្រមាញ់ឡាវ បានសង្កត់ធ្ងន់លើការប្តេជ្ញាចិត្តរបស់រដ្ឋាភិបាល ក្នុងការលើកកម្ពស់ផលិតកម្មកសិកម្ម ស្របតាមផែនការអភិវឌ្ឍន៍ សេដ្ឋកិច្ចសង្គមជាតិ របៀបវារៈជាតិ និងគោលនយោបាយសំដៅ កសាងសេដ្ឋកិច្ចឯករាជ្យ៕
ប្រែសម្រួល ឈូក បូរ៉ា
