ឥណ្ឌូណេស៊ី បង្កើនការវិនិយោគ លើវិស័យថាមពល និងរ៉ែរហូតដល់ ១៣,៩ ពាន់លានដុល្លារ នៅឆមាសទី១ ឆ្នាំ២០២៥
ហ្សាកាតា៖ ក្រសួងថាមពល និង ធនធានរ៉ែរបស់ប្រទេសឥណ្ឌូនេស៊ី បានប្រកាសថា ការវិនិយោគរបស់ប្រទេសនេះ នៅក្នុងវិស័យថាមពល និងធនធានរ៉ែ បានកើនឡើងដល់ ១៣.៩ ពាន់លានដុល្លារអាមេរិកនៅក្នុងឆមាសទីមួយនៃឆ្នាំ ២០២៥ ដែលជាចំនួនខ្ពស់បំផុតក្នុងរយៈពេល ៥ឆ្នាំចុងក្រោយនេះ។
ចំនួននេះបានកើនឡើង ២៤,១ ភាគរយធៀបនឹងរយៈពេលដូចគ្នាកាលពីឆ្នាំមុន ដែលមានចំនួន ១១,២ ពាន់លានដុល្លារ នេះបើយោងតាមការចុះផ្សាយរបស់ទីភ្នាក់ងារ សារព័ត៌មានចិនស៊ិនហួ។
លោក Bahlil Lahadalia រដ្ឋមន្ត្រីក្រសួងថាមពល និងធនធានរ៉ែ បានប្រាប់សន្និសីទ សារព័ត៌មាននៅទីក្រុងហ្សាកាតាថា “ការវិនិយោគភាគច្រើនគឺនៅក្នុងវិស័យធ្យូងថ្ម និងឧស្ម័ន។ អនុវិស័យ ដែលមានការវិនិយោគខ្ពស់បំផុត គឺប្រេង និងឧស្ម័នធម្មជាតិ ដែលមានតម្លៃវិនិយោគ ៨.១ ពាន់លានដុល្លារ បន្ទាប់មកគឺរ៉ែ និងធ្យូងថ្ម ៣.១ ពាន់លានដុល្លារ”។
កន្លងមក រដ្ឋមន្ត្រីក្រសួង វិនិយោគឥណ្ឌូណេស៊ី លោក Rosan Roeslani បានឲ្យដឹងថា ការវិនិយោគសរុប នៅក្នុងត្រីមាសទីពីរនៃឆ្នាំនេះឈានដល់ ៤៧៧.៧ ទ្រីពាន់លានរូពៀ (ប្រហែល ២៩.៣ ពាន់លានដុល្លារ) ដែលតំណាងឱ្យការកើនឡើង ១១.៥ ភាគរយ ពីមួយឆ្នាំទៅមួយឆ្នាំ៕
ប្រែសម្រួល ឈូក បូរ៉ា
