ភ្លៀងធ្លាក់ខ្លាំងរយៈពេល ១០ម៉ោង បង្កឡើងដោយព្យុះទីហ្វុង Kajiki បានធ្វើឱ្យលិចផ្សារ និងផ្ទះសម្បែង ក្នុងទីក្រុងហាណូយ ប្រទេសវៀតណាម
បរទេស៖ អស់រយៈពេល ១០ ម៉ោង កាលពីថ្ងៃអង្គារ ភ្លៀងធ្លាក់ខ្លាំងដែលបង្កឡើង ដោយព្យុះទីហ្វុង Kajiki បានធ្វើឱ្យជន់លិចផ្សារ និងផ្ទះសម្បែង យានយន្តជាប់គាំង និងស្ទះចរាចរណ៍នៅទូទាំង ទីក្រុងហាណូយ ប្រទេសវៀតណាម ដែលរំខានដល់ជីវិតប្រចាំថ្ងៃរបស់ប្រជាជន។
យោងតាមសារព័ត៌មាន VN Express ចេញផ្សាយកាលពីថ្ងៃទី២៦ ខែសីហា ឆ្នាំ២០២៥ បានឱ្យដឹងថា នៅម៉ោង ៥ ល្ងាច កាលពីថ្ងៃអង្គារ ផ្លូវ Vo Chi Cong ដែលជាសរសៃឈាមតភ្ជាប់កណ្តាលទីក្រុងហាណូយ ទៅកាន់អាកាសយានដ្ឋាន Noi Bai នៅតែជន់លិចយ៉ាងខ្លាំង។ រថយន្តជាច្រើនបានជាប់គាំង និងអូសឡានទៅចិញ្ចើមផ្លូវ ហើយអាជ្ញាធរកំពុងរឹតបន្តឹងចរាចរណ៍ឆ្លងកាត់តំបន់នោះ។
គិតត្រឹមម៉ោង 2 រសៀល ក្រុមហ៊ុនបង្ហូរទឹកហាណូយបានកត់ត្រាទីតាំងលិចទឹកចំនួន ៣៥ នៅសង្កាត់កណ្តាលក្រុងរបស់វៀតណាម ដែលបង្កការកកស្ទះ និងរំខានចរាចរណ៍។
ព្យុះទីហ្វុង Kajiki បានវាយប្រហារភាគកណ្តាលប្រទេសវៀតណាមកាលពីរសៀលថ្ងៃច័ន្ទ ហើយបានចុះខ្សោយទៅជាត្រូពិចនៅព្រឹកថ្ងៃអង្គារ ដោយបានបញ្ចេញនូវភ្លៀងធ្លាក់យ៉ាងខ្លាំងនៅតាមផ្លូវ៕
ប្រែសម្រួលៈ ណៃ តុលា
