ជប៉ុន កំពុងសម្លឹងរកការ វិនិយោគក្នុង ទំហំទឹកប្រាក់ ៦៨ពាន់លានដុល្លា រក្នុងប្រទេសឥណ្ឌា
បរទេស៖ សារព័ត៌មាន Nikkei Asia បានរាយការណ៍ កាលពីថ្ងៃអង្គារថា ប្រទេសជប៉ុនកំពុងសម្លឹង រកការបណ្តាក់ទុន ក្នុងទំហំទឹកប្រាក់ ៦៨ ពាន់លានដុល្លារ នៅក្នុងប្រទេសឥណ្ឌាក្នុងរយៈពេល ១០ឆ្នាំខាងមុខ ដើម្បីពង្រឹងទំនាក់ ទំនងសេដ្ឋកិច្ចរវាងប្រទេសទាំងពីរ។
យោងតាមរបាយការណ៍បានឱ្យដឹងថា ការវិនិយោគនេះនឹងផ្តោតលើផ្នែកសំខាន់ៗដូចជា ឧបករណ៍អេឡិកត្រូនិក សារធាតុរ៉ែសំខាន់ៗ ទូរគមនាគមន៍ ថាមពលស្អាត ឱសថ និងបច្ចេកវិទ្យាខ្ពស់, នេះបើយោងតាមរបាយការណ៍។
ប្រព័ន្ធផ្សព្វផ្សាយបានឱ្យដឹងថា ការប្រកាសជាផ្លូវការត្រូវបាន រំពឹងទុកក្នុងអំឡុងពេលដំណើរ ទស្សនកិច្ចរបស់នាយករដ្ឋមន្ត្រី ឥណ្ឌា Narendra Modi ទៅកាន់ទីក្រុងតូក្យូនៅថ្ងៃទី 29-30 ខែសីហា។
ក្នុងអំឡុងពេលនៃកិច្ចប្រជុំនាពេលខាងមុខជាមួយលោក Modi នាយករដ្ឋមន្ត្រីជប៉ុន Shigeru Ishiba ត្រូវបានគេរំពឹងថានឹងបង្ហាញពីផែនការដើម្បីធ្វើឱ្យស៊ីជម្រៅកិច្ចសហប្រតិបត្តិការសេដ្ឋកិច្ចរវាងប្រទេសទាំងពីរ។
ប្រទេសជប៉ុនកំពុង សម្លឹងរកមើលការបង្កើនការវិនិយោគ នៅក្នុងប្រទេសអាស៊ីខាងត្បូង តាមរយៈជំនួយអភិវឌ្ឍន៍ផ្លូវការ ជាពិសេសផ្តោតលើការ ចាប់ផ្តើមអាជីវកម្ម ដែលកំពុងស្វែងរកការ ចូលទៅក្នុងទីផ្សារឥណ្ឌា។ ទីភ្នាក់ងារសហប្រតិបត្តិការ អន្តរជាតិជប៉ុន ក៏បានផ្តល់កម្ចីជាប្រាក់យ៉េន ដល់ក្រុមហ៊ុនចាប់ផ្តើមអាជីវកម្ម នៅទីក្រុង Hyderabad ភាគខាងត្បូងប្រទេស ឥណ្ឌារួចហើយ។
ការវិនិយោគថ្មីត្រូវបានគេរំពឹងថា នឹងអាចឱ្យក្រុមហ៊ុនជប៉ុន អាចពង្រីកវត្តមាន របស់ពួកគេនៅក្នុងប្រទេសឥណ្ឌា ជាពិសេសនៅក្នុងវិស័យបញ្ញាសិប្បនិមិត្ត និងផ្នែកឧបករណ៍អេឡិកត្រូនិក ។ របាយការណ៍បានឱ្យដឹងទៀតថា ជាផ្នែកមួយនៃយុទ្ធសាស្ត្រកំណើននេះ ក្រុមហ៊ុនជប៉ុន គ្រោងនឹងជួលអ្នកឯកទេស ឥណ្ឌាថែមទៀតផង៕
ប្រែសម្រួលៈ ណៃ តុលា
