គ្រួសារយោធិនពលីក្នុងជម្លោះព្រំដែនកម្ពុជា-ថៃទទួល បានផ្ទះថ្មី ដើម្បីដោះស្រាយជីវភាពរស់នៅ
ភ្នំពេញ ៖ គ្រួសារយោធិនរបស់អនុសេនីយ៍ឯក ថន ញ៉ាញ់ដែលបានពលីក្នុងជម្លោះព្រំដែនកម្ពុជា-ថៃជួបការលំបាកទទួលបានផ្ទះថ្មី ដើម្បីដោះស្រាយជីវភាពរស់នៅប្រចាំថ្ងៃ។
ការសាងសង់ផ្ទះថ្មីនេះមានទំហំ ៥ម៉ែត្រ គុណនឹង ៩ម៉ែត្រ ស្ថិតលើដីគ្រួសារយោធិនពលី អនុសេនីយ៍ឯក ថន ញ៉ាញ់ នៅភូមិសសរស្តម្ភ ឃុំសសរស្តម្ភ ស្រុកពួក ខេត្តសៀមរាប។
នាថ្ងៃទី៣១ ខែកក្កដា ឆ្នាំ២០២៥ ឯកឧត្តមកិត្តិសង្គហបណ្ឌិត គន់ គីម បានអញ្ជើញក្នុងពិធីក្រុងពាលី និងបញ្ចុះបឋមសិលាសាងសង់ផ្ទះជូនគ្រួសារយោធិនពលីខាងលើ។
សូមបញ្ជាក់ថា ជានិច្ចកាល សម្តេចតេជោ ហ៊ុន សែន ប្រធានព្រឹទ្ធសភា និងជាប្រធានសមាគមអតីតយុទ្ធជនកម្ពុជា, សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា និងសម្តេចធិបតី ហ៊ុន ម៉ាណែត នាយករដ្ឋមន្រ្តី បានចាត់ទុកការបំពេញភារកិច្ចដ៏ឧដុង្គឧត្តមរបស់កងទ័ព និងយុទ្ធជនពលីទាំងអស់ប្រកបដោយឧត្តមគតិ, ស្មារតីស្នេហាជាតិ និងបានលះបង់ខ្ពស់បំផុត ដើម្បីបុព្វហេតុការពារជាតិ និងសេចក្ដីសុខរបស់ប្រជាជន៕
