សមាជិកសភាជប៉ុន ជំរញឧ្យរដ្ឋាភិបាល ទទួលស្គាល់រដ្ឋប៉ាឡេស្ទីន
តូក្យូ៖ ក្រុមសមាជិកសភាជប៉ុន ដែលមិនប្រកាន់បក្សពួកកាលពីថ្ងៃព្រហស្បតិ៍បានដាក់ញត្តិមួយដែលមានហត្ថលេខាចំនួន ២០៦ ទៅកាន់រដ្ឋមន្ត្រីការបរទេសលោក Takeshi Iwaya ដោយជំរុញឱ្យរដ្ឋាភិបាលទទួលស្គាល់រដ្ឋប៉ាឡេស្ទីនមួយ។
ការផ្លាស់ប្តូរនេះបានធ្វើឡើងមុនសន្និសីទអន្តរជាតិកម្រិតខ្ពស់នៅទីក្រុងញូវយ៉កកាលពីថ្ងៃទី២២ ខែកញ្ញា ស្តីពីដំណោះស្រាយរដ្ឋពីរដែលបានស្នើឡើងចំពោះជម្លោះអ៊ីស្រាអែល និងប៉ាឡេស្ទីន ដែលអូសបន្លាយរាប់ទសវត្សរ៍។
លោកស្រី Tomoko Abe មកពីគណបក្សប្រជាធិបតេយ្យធម្មនុញ្ញនៃប្រទេសជប៉ុនបានឧ្យដឹងនៅពេលលោកស្រី និងសមាជិកបក្សប្រឆាំងពីរនាក់ផ្សេងទៀតនៃក្រុមជួបជាមួយរដ្ឋមន្ត្រីការបរទេសថា “អ៊ីស្រាអែលមិនមានចេតនាក្នុងការយល់ព្រមលើបទឈប់បាញ់នោះទេ ហើយការអត់ឃ្លានរបស់កុមារមិនអាចត្រូវបានគេមិនអើពើបាននោះទេ” ។
ក្រុមនេះក៏រួមបញ្ចូលសមាជិកនៃគណបក្សប្រជាធិបតេយ្យសេរី ដែលកំពុងកាន់អំណាចផងដែរ នេះបេីយោងតាមការចុះផ្សាយរបស់ទីភ្នាក់ងារសារព័ត៌មានក្យូដូជប៉ុន។
ប្រទេសនានា រួមទាំងបារាំង និងអង់គ្លេស គ្រោងនឹងទទួលស្គាល់រដ្ឋប៉ាឡេស្ទីន នៅពេលដែលសម្ពាធអន្តរជាតិ កើនឡើងលើអ៊ីស្រាអែល ជុំវិញសង្គ្រាមនៅតំបន់ហ្គាហ្សា និងវិបត្តិភាពអត់ឃ្លានកាន់តែអាក្រក់ទៅៗ។ ជប៉ុននៅតែថ្លឹងថ្លែងជំហររបស់ខ្លួន។
លោក Iwaya បានលេីកឡេីងថា “ខ្ញុំយកចិត្តទុកដាក់ចំពោះរឿងនេះ ចាប់តាំងពីហត្ថលេខាជាច្រើនត្រូវបានប្រមូល” ដោយបន្ថែមថា ក្រសួងនឹងពិនិត្យលើបញ្ហានេះបន្ថែមទៀត៕
ប្រែសម្រួល ឈូក បូរ៉ា
