ចិន ជំរុញភាគីពាក់ព័ន្ធ ជាពិសេសអ៊ីស្រាអែល ឱ្យធ្វើកិច្ចការបន្ថែមទៀត លើការបន្តការចរចាឡេីងវិញ
ប៉េកាំង៖ ប្រទេសចិន បានសម្តែងការព្រួយបារម្ភយ៉ាងខ្លាំង ចំពោះស្ថានការណ៍កាន់តែតានតឹងនៅមជ្ឈិមបូព៌ា ដោយជំរុញឱ្យភាគីពាក់ព័ន្ធ ជាពិសេសអ៊ីស្រាអែល ធ្វេីយ៉ាងណាខិតខំប្រឹងប្រែងជាវិជ្ជមានបន្ថែមទៀត ដើម្បីបន្តការចរចាឡើងវិញ។
អ្នកនាំពាក្យក្រសួងការបរទេសលោក Lin Jian បានធ្វើការកត់សម្គាល់នៅក្នុងសន្និសីទកាសែតជាប្រចាំដើម្បីឆ្លើយតបនឹងសំណួរពាក់ព័ន្ធ នេះបេីយោងតាមការចុះផ្សាយ របស់ទីភ្នាក់ងារ សារព័ត៌មានចិនស៊ិនហួ។
លោកបានលេីកឡេីងថា “ប្រទេសចិនមានការព្រួយបារម្ភយ៉ាងខ្លាំង អំពីស្ថានការណ៍កើនឡើងនៅមជ្ឈិមបូព៌ា” ដោយសង្កត់ធ្ងន់ថា ប្រទេសចិន ប្រឆាំង ទៅនឹងសកម្មភាព ដែលរំលោភលើអធិបតេយ្យភាព និងសន្តិសុខរបស់ប្រទេស ពាក់ព័ន្ធនៅក្នុងតំបន់។
លោកបានបន្ដថា ប្រទេសចិន ថ្កោលទោសរាល់សកម្មភាព ដែលបង្កអន្តរាយដល់ជនស៊ីវិលស្លូតត្រង់ និងប្រឆាំងរាល់សកម្មភាព ដែលធ្វើឱ្យភាពតានតឹងកាន់តែធ្ងន់ធ្ងរ និងអាចធ្វើឲ្យស្ថានការណ៍ក្នុងតំបន់កាន់តែកើនឡើង។
លោកបានថ្លែងថា អំពើហិង្សាមិនអាចនាំមកនូវសន្តិសុខទេ ហើយការប្រើកម្លាំងក៏មិននាំឲ្យមានសន្តិភាពដែរ។
លោកបានបន្ថែមថា ប្រទេសចិន ជំរុញយ៉ាងខ្លាំងដល់ភាគីពាក់ព័ន្ធទាំងអស់ ជាពិសេសអ៊ីស្រាអែល ឱ្យខិតខំប្រឹងប្រែងជាវិជ្ជមានបន្ថែមទៀត ដើម្បីឈប់បាញ់ ចាប់ផ្តើមការចរចាឡើងវិញ និងស្ដារសន្តិភាព និងស្ថិរភាពក្នុងតំបន់ ជាជាងធ្វើផ្ទុយពីនេះ៕
ប្រែសម្រួល ឈូក បូរ៉ា
