លោក ត្រាំ ពន្យាពេលកំណត់ការហាមឃាត់ TikTok ដល់ថ្ងៃទី១៦ ខែធ្នូ ជាមួយនឹងកិច្ចព្រមព្រៀងចុងក្រោយជិតមកដល់
វ៉ាស៊ីនតោន៖ ប្រធានាធិបតីអាមេរិកលោក ដូណាល់ ត្រាំ បានចុះហត្ថលេខាលើបទបញ្ជាប្រតិបត្តិ ដែលអូសបន្លាយរហូតដល់ថ្ងៃទី១៦ ខែធ្នូ ជាថ្ងៃផុតកំណត់ សម្រាប់ប្រតិបត្តិការ TikTok របស់អាមេរិក ត្រូវបំបែកចេញពីការគ្រប់គ្រងរបស់ម្ចាស់ចិន ជាមួយនឹងការបរាជ័យ ក្នុងការធ្វើដូច្នេះនាំឱ្យមានការហាមឃាត់ លើមូលដ្ឋានសន្តិសុខជាតិ។
ការផ្តល់ខ្សែជីវិតមួយផ្សេងទៀត សម្រាប់ TikTok របស់លោក ត្រាំ បានកើតឡើងនៅពេលដែលរដ្ឋបាលរបស់លោក ហើយទីក្រុងប៉េកាំង ហាក់ដូចជាស្ថិតក្នុងដំណាក់កាលចុងក្រោយ នៃការយល់ព្រមផ្ទេរ ទ្រព្យសម្បត្តិរបស់កម្មវិធីចែករំលែក វីដេអូដ៏ពេញនិយមរបស់សហរដ្ឋអាមេរិក ពីម្ចាស់ក្រុមហ៊ុន ByteDance Ltd. របស់ចិន ទៅកាន់ម្ចាស់ ជនជាតិអាមេរិក។
ការពន្យារលើកមុន ដែលជាលើកទីបីត្រូវបានកំណត់ថានឹងផុតកំណត់នៅថ្ងៃពុធ។ បន្ទាប់ពីកិច្ចពិភាក្សារយៈពេលពីរថ្ងៃនៅទីក្រុងម៉ាឌ្រីត មន្ត្រីជាន់ខ្ពស់របស់សហរដ្ឋអាមេរិក និងចិនបានឧ្យដឹងកាលពីថ្ងៃចន្ទថា ប្រទេសទាំងពីរបានយល់ព្រមលើ “ក្របខ័ណ្ឌ” ដើម្បីរក្សាកម្មវិធីនេះឱ្យនៅមានជីវិតសម្រាប់អ្នកប្រើប្រាស់អាមេរិកប្រមាណ ១៧០លាននាក់។
លោក ត្រាំ គ្រោងនឹងជួបជជែកជាមួយប្រធានាធិបតីចិនលោក ស៊ី ជីនពីង នៅថ្ងៃសុក្រ។ ប្រធានាធិបតីអាមេរិក បានឧ្យដឹងនៅព្រឹកថ្ងៃអង្គារនេះថា កិច្ចព្រមព្រៀងមួយត្រូវបានឈានដល់រួចហើយ ដោយសារ “យើងមានក្រុមក្រុមហ៊ុនធំៗជាច្រើនដែលចង់ទិញវា”។
រដ្ឋមន្ត្រីក្រសួងរតនាគារសហរដ្ឋអាមេរិកលោក Scott Bessent ដែលបានចូលរួមក្នុងការចរចានៅរដ្ឋធានីអេស្ប៉ាញបាននិយាយនៅក្នុងបទសម្ភាសន៍ CNBC ថា លោក ត្រាំ និង លោក ស៊ី នឹងយល់ព្រមលើកិច្ចព្រមព្រៀងចុងក្រោយ ក្នុងអំឡុងពេលការហៅទូរស័ព្ទនាពេលខាងមុខ។
រចនាសម្ព័ន្ធច្បាស់លាស់នៃការផ្តាច់ខ្លួនរបស់ TikTok នៅតែមិនច្បាស់លាស់ ប៉ុន្តែប្រព័ន្ធផ្សព្វផ្សាយធំៗមួយចំនួនរបស់សហរដ្ឋអាមេរិកបានរាយការណ៍ថា អាជីវកម្មសហរដ្ឋអាមេរិករបស់កម្មវិធីនេះ ត្រូវបានគេរំពឹងថា នឹងគ្រប់គ្រងដោយសម្ព័ន្ធវិនិយោគិន រួមទាំងក្រុមហ៊ុនបច្ចេកវិទ្យាយក្ស Oracle Corp៕
ប្រែសម្រួល ឈូក បូរ៉ា
