ប្រើប្រាស់page facebookបោកប្រាក់មួយចំនួនធំត្រូវចាប់ខ្លួននៅមណ្ឌលគិរី
មណ្ឌលគិរីៈមិនសរសើរមិនបាន ស្នងការដ្ឋាននគរបាលខេត្តមណ្ឌលគិរី បានបំបែកសំណុំរឿងឆបោកតាមបណ្តាញសង្គម រហូតឈានទៅដល់ការចាប់ខ្លួនស្ត្រីជាមេក្លោងម្នាក់ដាក់ពន្ធនាគារ ក្រោយធ្វើសកម្មភាព ជាក្រុម បោកប្រាក់ជនរងគ្រោះកាលពីជិត១ខែមុន។
មានការបញ្ជាក់ថាសកម្មភាពរបស់ក្រុមនេះមានការចាត់តាំង មានមេ មានកើយ មានបច្ចេកទេសកាត់តឯកសារត្រឹមត្រូវ ដែលជាហេតុ អាចឆបោកជនរងគ្រោះបានយ៉ាងងាយ។ឆ្លើយតបបន្ទាប់ពីបង្ក្រាបករណីនេះលោកឧត្តមសេនីយ៍ទោ ឡោ សុខា ស្នងការនគរបាលខេត្តមណ្ឌលគិរី បានផ្តាំផ្ញើរដល់បងប្អូនប្រជាពលរដ្ឋទាំងអស់ ត្រូវប្រុងប្រយ័ត្នជាមួយកម្ចីខុសច្បាប់ ដែលគ្មានប្រភពត្រឹមត្រូវ ។ នៅពេលជួបប្រទះហេតុការណ៍ ឬត្រូវជនសង្ស័យលួងលោមឲ្យខ្ចីប្រាក់ខុសប្រក្រតី ត្រូវរាយការណ៍ទៅសមត្ថកិច្ចដែលនៅជិតបំផុត ដើម្បីងាយស្រួលក្នុងការស្រាវជ្រាវនិងបង្ក្រាបទាន់ពេលវេលា ។
សូមបញ្ជាក់ថាករណីឆបោកនិងអាចលួងលោមជនរងគ្រោះបានប្រាក់កាស១ចំនួនធំនេះគឺកើតឡើងកាលពីថ្ងៃទី២ខែសីហាឆ្នាំ២០២៥។នៅថ្ងៃដដែលនាវេលាម៉ោងប្រមាណជា១៤និង៤៥នាទីរសៀល ត្រូវសមត្ថកិច្ចបញ្ជាក់ថា មានបណ្ដាញទំនាក់ទំនងសង្គមហ្វេសប៊ុកឈ្មោះ នាគក្រហម ដែលគ្រប់គ្រង និងប្រើប្រាស់ដោយជនរងគ្រោះឈ្មោះ ទ. ច. ថ .រ បានទាក់ទងទៅបណ្ដាញទំនាក់ទំនងសង្គមFacebook Pageមួយ ឈ្មោះ ហេង ហេង ប្រាក់កម្ចី ដែលគ្រប់គ្រងដោយឈ្មោះ ទូច ចន្ធូ រួមទាំង មានក្រុមការងាររបស់ខ្លួនបីនាក់ផ្សេងទៀត មានទាំងអ្នកចាំជួយកាត់តក្លែងឯកសារ អ្នកទទួលប្រាក់ ជាដើម ។
ប្រភពបន្តថា គោលបំណងរបស់ឈ្មោះ ទួង ចាន់ថារិទ្ធិ បានទាក់ទងទៅបណ្ដាញទំនាក់ទំនងសង្គមFacebook Page ឈ្មោះ ហេង ហេង ប្រាក់កម្ចី គឺ ដើម្បីខ្ចីប្រាក់សរុបចំនួន ១៥ ០០០$ (មួយម៉ឺនប្រាំពាន់ដុល្លារ) ។ ដោយ ឈ្មោះ ទូច ចន្ធូ, និងបក្ខពួកបានប្រើប្រាស់ឧបាយកល ក្នុងនាមជាអ្នកឲ្យខ្ចីប្រាក់ និងលួងលោមក្នុងរូបភាពផ្សេងៗ ដើម្បីឲ្យជនរងគ្រោះ ឈ្មោះ ទ. ច. ថ .រ ត្រូវផ្ញើរប្រាក់មកខ្លួន ជាបន្ដបន្ទាប់រហូតដល់ចំនួន ៩ ៥០០$ (ប្រាំបួនពាន់ប្រាំរយដុល្លារអាមេរិក)។
ដោយសារតែត្រូវការលុយបន្ទាន់ និងត្រូវជនឆបោកប្រើប្រាស់វិធីសាស្ត្រជាច្រើន បណ្តាលឲ្យជនរងគ្រោះឈ្មោះ ទ. ច. ថ .រ ធ្លាក់ក្នុងឧបាយកល រហូតផុងខ្លួន ផ្ញើប្រាក់ឲ្យទៅក្រុមជនឆបោក តាមរយៈគណនីABA ឈ្មោះ TOUCH CHANTHOU និងវេរប្រាក់តាមវីងមានលេខទូរស័ព្ទ០៧៧ ៩១៦ ៦៦៣ ជាបន្តបន្ទាប់ទើបដឹងខ្លួនថា ចាញ់បោកគេទៅហើយ។
រហូតដល់ថ្ងៃទី០៨ ខែកញ្ញា ឆ្នាំ២០២៥ កម្លាំងការិយាល័យនគរបាលព្រហ្មទណ្ឌកម្រិតស្រាលនៃស្នងការដ្ឋាននគរបាលខេត្តមណ្ឌលគិរី សហការជាមួយកម្លាំងស្នងការដ្ឋាននគរបាលរាជធានីភ្នំពេញបាន ចុះអនុវត្តដីកាបញ្ជាឱ្យចូលខ្លួន ដោយឃាត់បានជនសង្ស័យឈ្មោះ ទូច ចន្ធូ ជាមេក្លោង យកទៅចាត់ការតាមនីតិវិធីច្បាប់ និងបានបញ្ជូនទៅដាក់ពន្ឋនាគារខេត្ត។ចំណែកបក្ខពួកដែលនៅសេសសល់ សមត្ថកិច្ចកំពុងស្រាវជ្រាវបន្ថែម ៕
ដោយ:ចាន់បុត្រ|មណ្ឌលគិរី|ដើមអម្ពិល
