ភ្នំពេញ៖ លោក ហេង សួរ រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ និងលោក អ៊ូអិណុ អាត់ស៊ូស៊ី (UENO Atsushi) ឯកអគ្គរាជទូតជប៉ុនប្រចាំកម្ពុជា បានអញ្ជើញចូលរួមជាសហអធិបតីក្នុងពិធីប្រគល់-ទទួលឧបករណ៍ សម្ភារៈ និងបរិក្ខារបច្ចេកទេសសម្រាប់បណ្តុះបណ្តាលជំនាញអគ្គិសនី ដែលជាជំនួយឥតសំណងរបស់រាជរដ្ឋាភិបាលជប៉ុនជូនដល់ក្រសួងការងារ និងបណ្តុះបណ្តាលវិជ្ជាជីវៈ នារសៀលថ្ងៃទី១៦ ខែកញ្ញា ឆ្នាំ២០២៥នេះ នៅវិទ្យាស្ថានជាតិបណ្តុះបណ្តាលបច្ចេកទេស។
ថ្លែងក្នុងឱកាសនោះ លោករដ្ឋមន្ត្រីបានថ្លែងអំណរគុណយ៉ាងជ្រាលជ្រៅទៅដល់រាជរដ្ឋាភិបាលជប៉ុន និងប្រជាជនជប៉ុនចំពោះការផ្តល់ជំនួយឥតសំណងដ៏មានសារៈសំខាន់ក្នុងការរួមចំណែកដល់ការអភិវឌ្ឍធនធានមនុស្សនៅកម្ពុជា និងលើកកម្ពស់គុណភាពនៃការបណ្តុះបណ្តាលជំនាញវិជ្ជាជីវៈ និងបច្ចេកទេស។
លោករដ្ឋមន្ត្រី ក៏បានលើកឡើងបន្ថែមថា ជំនួយរបស់ជប៉ុននៅក្នុងវិស័យអប់រំរបស់កម្ពុជានាពេលកន្លងមក បានរួមចំណែកកសាងសមត្ថភាពធនធានមនុស្សកម្ពុជា និងចូលរួមយ៉ាងសកម្មក្នុងការអភិវឌ្ឍ និងស្តារកម្ពុជាឡើងវិញ។ ប្រទេសជប៉ុន ជាដៃគូដ៏សំខាន់មិនអាចកាត់ផ្តាច់បានលើការអភិវឌ្ឍ ជាពិសេស លើការអប់រំបណ្តុះបណ្តាលបច្ចេកទេស និងវិជ្ជាជីវៈនៅកម្ពុជា។
លោករដ្ឋមន្ត្រីបញ្ជាក់ថា ឧបករណ៍ សម្ភារៈ និងបរិក្ខារបច្ចេកទេស ដែលបានផ្តល់មកកម្ពុជា នឹងក្លាយជាវត្ថុទិព្វបន្ថែមទៀតដល់សិស្ស និសិ្សត TVET កម្ពុជាឱ្យមានឱកាសប្រើប្រាស់បច្ចេកវិទ្យារបស់ជប៉ុន ដើម្បីអនុវត្តន៍លើទ្រឹស្តីដែលបានសិក្សា។
ជាមួយគ្នានេះ លោក អ៊ូអិណុ អាត់ស៊ូស៊ី ឯកអគ្គរាជទូតជប៉ុនប្រចាំកម្ពុជា បានលើកឡើងថា នៅក្នុងវិស័យផលិតកម្មនៅកម្ពុជា ត្រូវការកម្លាំងពលកម្មជំនាញ។ ដូចនេះ ជំនួយនេះ នឹងជួយឱ្យយុវជនកម្ពុជាបង្កើននូវសមត្ថភាពជំនាញចាំបាច់ ដើម្បីចូលរួមចំណែកដល់កំណើនសេដ្ឋកិច្ចរបស់កម្ពុជា។
លោកឯកអគ្គរាជទូតបានបញ្ជាក់ អំពីការប្តេជ្ញាចិត្តរបស់រាជរដ្ឋាភិបាលជប៉ុនលើការពង្រឹងនូវទំនាក់ទំនងមិត្តភាពជាមួយកម្ពុជា និងបន្តផ្តល់ការគាំទ្រ ដើម្បីធានាដល់ការអភិវឌ្ឍទៅវិញទៅមកនៃប្រទេសទាំងពីរ។
ការផ្តល់ឧបករណ៍ សម្ភារៈ និងបរិក្ខារបច្ចេកទេសក្នុងជំនាញអគ្គិសនី ដែលជាជំនួយឥតសំណងរបស់រាជរដ្ឋាភិបាលជប៉ុន មានតម្លៃសរុប ៤០០លានយ៉េន ស្មើនឹងប្រមាណ ៣,៦៣លានដុល្លារអាម៉េរិក បានប្រគល់ជូនវិទ្យាស្ថានចំនួន ៣ គឺវិទ្យាស្ថានជាតិពហុបច្ចេកទេសកម្ពុជា (NPIC), វិទ្យាស្ថានជាតិបណ្តុះបណ្តាលបច្ចេកទេស (NTTI), និង វិទ្យាស្ថានពហុបច្ចេកទេសព្រះកុសុមៈ (PPI)៕
