សង្គ្រាមអ៊ីស្រាអែល លើតំបន់ហ្គាហ្សា ស្ថិតក្នុងចំណោមរឿង ដ៏រន្ធត់បំផុត នៃសតវត្សរ៍ទី២០ និងទី ២១
យូអិន៖ ប្រធានាធិបតី ប៉ាឡេស្ទីនលោក Mahmoud Abbas បានចោទប្រកាន់អ៊ីស្រាអែលថា បានប្រព្រឹត្ត “សង្រ្គាមប្រល័យ ពូជសាសន៍” លើតំបន់ហ្គាហ្សា ដោយថាឧក្រិដ្ឋកម្មទាំងនេះ នឹងត្រូវបានកត់ត្រានៅក្នុង “ទំព័រនៃមនសិការអន្តរជាតិថា ជាជំពូកដ៏គួរឱ្យរន្ធត់បំផុតមួយ នៃសោកនាដកម្ម មនុស្សធម៌ក្នុង ទសវត្សរ៍ទី ២០ និងទី២១” ។
លោកបានលេីកឡេីងនៅពេលថ្លែងទៅ កាន់មហាសន្និបាតអង្គការ សហប្រជាជាតិតាមរយៈតំណភ្ជាប់វីដេអូថា “ខ្ញុំនិយាយទៅកាន់អ្នកនៅថ្ងៃនេះ បន្ទាប់ពីជិតពីរឆ្នាំ ដែលប្រជាជនប៉ាឡេស្ទីន របស់យើង នៅតំបន់ហ្គាហ្សាស្ទ្រីប បានប្រឈមមុខនឹងសង្រ្គាមនៃការប្រល័យពូជសាសន៍ ការបំផ្លិចបំផ្លាញ ការអត់ឃ្លាន និងការផ្លាស់ទីលំនៅ”។
លោកបានសង្កត់ធ្ងន់ថា អំពើប្រល័យពូជសាសន៍ត្រូវបាន “វាយប្រហារដោយកងកម្លាំងកាន់កាប់របស់អ៊ីស្រាអែល” ដែលក្នុងនោះពួកគេបានសម្លាប់ និងធ្វើឱ្យជនជាតិប៉ាឡេស្ទីនជាង ២២ម៉ឺននាក់រងរបួស ដែលភាគច្រើនជាកុមារ ស្ត្រី និងមនុស្សចាស់។
លោកប្រធានាធិបតីក៏បានថ្កោលទោសការពង្រីកការតាំងទីលំនៅរបស់រដ្ឋាភិបាលអ៊ីស្រាអែលនៅលើតំបន់ West Bank ដោយព្រមានថាវាគំរាមកំហែងដល់ដំណោះស្រាយរដ្ឋពីរ។
លោក Abbas បានលេីកឡេីងថា “យើងច្រានចោល និងបដិសេធទាំងស្រុង” នូវផែនការ របស់នាយករដ្ឋមន្ត្រី អ៊ីស្រាអែលលោក បេនចាមីន ណេតាន់យ៉ាហ៊ូ សម្រាប់ “អ៊ីស្រាអែលកាន់តែធំ” ខណៈពេលដែលកំពុង ទាក់ទាញការយកចិត្តទុកដាក់ ចំពោះការកើនឡើងនៃ “អំពើភេរវកម្មនៃអ្នកតាំងទីលំនៅ”៕
ប្រែសម្រួល ឈូក បូរ៉ា
