កូរ៉េខាងជើង ត្រៀមរៀបចំពិធីព្យុហយាត្រា យោធាសម្រាប់ខួប ៨០ឆ្នាំរបស់បក្សកាន់អំណាច
ព្យុងយ៉ាង៖ ប្រភពព័ត៌មាន ពីកងកម្លាំងប្រដាប់អាវុធ របស់កូរ៉េខាងត្បូងបានឧ្យដឹងថា ប្រទេសកូរ៉េខាងជើង កំពុងរៀបចំធ្វើព្យុហយាត្រាយោធាទ្រង់ទ្រាយធំ ដើម្បីប្រារព្ធខួបលើកទី៨០ នៃគណបក្សពលករកូរ៉េ ដែលកំពុងកាន់អំណាចនៅថ្ងៃទី១០ ខែតុលា។
ប្រភពបានឧ្យដឹងថា ខាងជើងអាចនឹងធ្វើការដង្ហែពេលយប់ ជាមួយនឹងទាហានរាប់ម៉ឺននាក់។ យោធាកូរ៉េខាងត្បូងបានបង្កើនការឃ្លាំមើល ចាប់ចលនាយានយន្ត និងសញ្ញានៃការត្រៀមខ្លួន ។
មន្ត្រីជាន់ខ្ពស់មកពីប្រទេសចិន និងរុស្ស៊ី ត្រូវបានគេរំពឹងថា នឹងចូលរួម ដោយកូរ៉េខាងជើងទំនងជាចង់បង្ហាញព្រឹត្តិការណ៍នេះជាការជួបជុំអន្តរជាតិ។
ទន្ទឹមនឹងនោះ ទីភ្នាក់ងារសារព័ត៌មានមជ្ឈិមកូរ៉េ ដែលគ្រប់គ្រងដោយរដ្ឋរបស់ប្រទេសនេះ បានឧ្យដឹងថា មេដឹកនាំលោក គីម ជុងអ៊ុន បានអញ្ជើញប្រធានាធិបតីឡាវ លោក ថងលូន ស៊ីសូលីត ទៅបំពេញទស្សនកិច្ចនៅកូរ៉េខាងជើង សម្រាប់ខួបនេះ។ បើបែបនេះមែន វានឹងជាដំណើរទស្សនកិច្ចលើកដំបូងរបស់មេដឹកនាំកំពូលឡាវ ចាប់តាំងពីខែកញ្ញា ឆ្នាំ២០១១។
លោក គីម ជុងអ៊ុន ត្រូវបានដកស្រង់សម្តីដោយប្រព័ន្ធផ្សព្វផ្សាយផ្លូវការ កាលពីចុងខែកញ្ញា ដោយថា កូរ៉េខាងជើងបានទទួល “អាវុធសម្ងាត់” ថ្មី ដោយមានអ្នកវិភាគយោធាកំពុងមើលថា តើពួកគេនឹងត្រូវបានបង្ហាញ នៅឯព្យុហយាត្រាដែរឬទេ៕
ប្រែសម្រួល ឈូក បូរ៉ា
