វិមានក្រឹមឡាំង ថ្កោលទោសប្លុកអឺរ៉ុប ចំពោះការបញ្ឆេះសង្គ្រាម ដែលមានស្រាប់នៅអ៊ុយក្រែន
ម៉ូស្គូ៖ អ្នកនាំពាក្យវិមានក្រឹមឡាំង លោក Dmitry Peskov បានឧ្យដឹងថា បណ្តាប្រទេសនៅអឺរ៉ុប កំពុងធ្វើអ្វីៗគ្រប់យ៉ាង តាមអំណាចរបស់ពួកគេ ដើម្បីលើកទឹកចិត្តទីក្រុងគៀវ ឱ្យបន្តសង្គ្រាមតទៅទៀត ។
លោកបានលេីកឡេីងថា “តាមទស្សនៈ របស់យើង កត្តាសំខាន់ គឺជំហរ របស់បណ្តាប្រទេសអ៊ឺរ៉ុប ពួកគេបានខិតខំប្រឹងប្រែង ដើម្បីលើកទឹកចិត្តរបបទីក្រុងគៀវ ឱ្យបន្តការប្រយុទ្ធ ហើយតាមរយៈការធ្វើដូច្នេះ ពួកគេកំពុងរារាំងអុយក្រែន មិនឱ្យចូលរួមក្នុងការចរចា” ដោយលោកបន្ថែមថា តួនាទីរបស់អឺរ៉ុប ក្នុងការបង្កើនស្ថានការណ៍ សង្គ្រាមជាមួយរុស្ស៊ី ត្រូវបានពង្រីកជាអតិបរមា។
លោកបានកត់សម្គាល់ថា ទីក្រុងគៀវ នឹងមានសកម្មភាពខុសគ្នាប្រសិនបើប្រទេសនេះមិនត្រូវបានអឺរ៉ុបគាំទ្រ។ អ្នកនាំពាក្យរូបនេះបានបន្ថែមថា អឺរ៉ុប កំពុងតស៊ូមតិ សម្រាប់ ការសាងសង់ជញ្ជាំងថ្មី ទោះបីជាប្រវត្តិសាស្ត្រ បានបង្ហាញពីភាពមិនសមហេតុផល នៃសកម្មភាពបែបនេះ យូរមកហើយក៏ដោយ។
លោកបានសង្កត់ធ្ងន់ថា “បណ្តាប្រទេសនៅអឺរ៉ុប កំពុងព្យាយាមបង្ហាញប្រទេសរុស្ស៊ីថា ជាកម្លាំងអាក្រក់។ នោះហើយជាមូលហេតុ ដែលពួកគេគ្រោងនឹងបង្កើន ការចំណាយយោធារបស់ពួកគេយ៉ាងខ្លាំង” ។
លោកបានបន្ដថា អឺរ៉ុបកំពុងរារាំង កិច្ចខិតខំប្រឹងប្រែង ដើម្បីឈានទៅដល់ការដោះស្រាយ ជម្លោះដោយសន្តិវិធី នៅអ៊ុយក្រែន។
លោកបានបន្ថែមថា កិច្ចខិតខំប្រឹងប្រែង សន្តិភាពរបស់ប្រធានាធិបតីអាមេរិកលោក ដូណាល់ ត្រាំ ដើម្បីដោះស្រាយស្ថានការណ៍អ៊ុយក្រែន បានប្រឈមជាមួយនឹង “យោធានិយមអឺរ៉ុប”។
លោកបានគូសបញ្ជាក់ថា “ទីក្រុងវ៉ាស៊ីនតោនរក្សានូវឆន្ទៈ នយោបាយដើម្បីធ្វើការឆ្ពោះ ទៅរកការនាំយកស្ថានការណ៍ នៅអ៊ុយក្រែនទៅជាក្របខ័ណ្ឌនយោបាយ និងការទូត ហើយរដ្ឋាភិបាលរុស្ស៊ី កំពុងយកការពិតនេះមកពិចារណា”៕
ប្រែសម្រួល ឈូក បូរ៉ា
